Ўзбекистонда “E-bozor” ягона рақамли бозор платформаси жорий этилади
Платформада бўш савдо ўринлари ҳақидаги маълумотлар эълон қилиниб, бир қатор хизматлар онлайн кўрсатилади.
Ўзбекистонда бозорлар ва савдо комплекслари фаолиятини рақамлаштириш мақсадида “E-bozor” ягона рақамли бозор платформаси босқичма-босқич ишга туширилади. Бу Ҳукуматнинг “Бозорлар ва савдо комплексларида рақамлаштириш ишларини самарали ташкил этиш ҳамда маиший коррупциянинг олдини олишга доир чора-тадбирлар тўғрисида”ги қарорида белгиланди.
Қарорга кўра, “E-bozor” платформаси 2026 йил 1 октябргача синов тариқасида, 2027 йил 1 мартгача эса тўлиқ амалиётга жорий этилади.
Платформа орқали бозорлар ва савдо комплексларининг паспорти, манзили, бўш савдо шохобчалари ҳамда савдо ўринлари ҳақидаги маълумотлар очиқ эълон қилиб борилади. Шунингдек, фуқаролар бозорлар фаолиятига оид маълумотлар билан танишиши, бозор маъмуриятига электрон мурожаат юбориши ва унга жавоб олиши мумкин бўлади.
“E-bozor” платформаси “Солиқ” ахборот тизимлари комплекси таркибида жорий этилади. Шунингдек, ҳар бир бозор ва савдо комплексига солиқ органлари ходимлари бириктирилиб, уларнинг фаолияти самарадорлиги ҳар куни таҳлил қилинади.
Қарорга мувофиқ, бозорлар ҳудуди ва уларга туташ автотураргоҳларда тўловларни ягона QR-код орқали амалга ошириш имконияти яратилади.
Бундан ташқари, 2026 йил 1 августдан бошлаб транспорт воситаларини жарима майдончаларидан чиқариш учун рухсатнома фақат маъмурий ишни кўриб чиқувчи орган ва ижро органи томонидан “Жарима майдончаси” ахборот тизими орқали QR-код билан тасдиқланиб, электрон шаклда юборилади.
