Наманганда 27 нафар болага ноқонуний диний таълим берган шахс ушланди
Гумонланувчи вояга етмаган болаларга ойига 100 АҚШ доллари эвазига ноқонуний диний таълим бериб келган.
Наманган вилоятининг Янги Наманган туманида вояга етмаган болаларга ноқонуний диний таълим бериш ҳолати аниқланди. Бу ҳақда Ички ишлар вазирлиги маълум қилди.
Қайд этилишича, “Хавфсиз ва соғлом юрт” тезкор-профилактик тадбирлари доирасида Наманган вилояти ИИБ, Давлат хавфсизлик хизмати ҳамда Янги Наманган тумани ИИБ ходимлари томонидан ўтказилган тезкор тадбир давомида қонунга зид диний таълим ташкил этилгани фош этилган.
Дастлабки маълумотларга кўра, Янги Наманган туманининг Янги Замин маҳалласида яшовчи фуқаро жорий йилнинг июнь ойидан буён ўз хонадонида 27 нафар вояга етмаган болага ойига 100 АҚШ доллари эвазига ноқонуний диний таълим бериб келган.
Мазкур ҳолат юзасидан Жиноят кодексининг 229²-моддаси 2-қисми билан жиноят иши қўзғатилиб, тергов ҳаракатлари олиб борилмоқда.
Шунингдек, ноқонуний диний таълим олган 27 нафар вояга етмаганнинг ота-оналарига нисбатан Маъмурий жавобгарлик тўғрисидаги кодекснинг 47-моддасига асосан базавий ҳисоблаш миқдорининг беш баравари миқдорида жарима жазоси тайинланди.
