Янги Конституция Токаевнинг қайта сайланишига йўл очди
Аввалги Конституция асосида сайланган президент янги Конституция кучга киргач яна президентликка номзодини қўйиши мумкин.
Қозоғистон Конституциявий суди президент мурожаати асосида мамлакатнинг янги Конституциясидаги президентлик муддати ва давлат лавозимларига оид нормаларга расмий талқин берди.
Суд қарорига кўра, 1995 йилдаги Конституция асосида ушбу конституциявий нормаларда назарда тутилган лавозимларни эгаллаган шахслар 2026 йил 1 июлдан кучга кирган янги Конституция амал қила бошлаганидан сўнг тегишли лавозимларга қайта сайланиши ёки тайинланиши мумкин.
Мазкур талқинга мувофиқ, амалдаги президент Қосим-Жомарт Тўқаев ҳам янги Конституция асосида президентлик сайловларида яна номзодини илгари суриш ҳуқуқига эга бўлади.
Қайд этилишича, янги Конституциянинг 43-моддаси 1-банди президент ваколат муддатини тартибга солади. Унга кўра, бир шахс Қозоғистон Президенти этиб бир неча марта сайланиши мумкин эмас. Бироқ Конституциявий суд ушбу норма янги Конституция кучга киргунга қадар эгалланган президентлик ваколатларига нисбатан қандай қўлланиши юзасидан расмий изоҳ берди.
Эслатиб ўтамиз, Қозоғистонда янги Конституция 1 июлдан кучга кирган. Ҳужжатга кўра, президент етти йил муддатга сайланади ва бир шахс ушбу лавозимни фақат бир муддат эгаллаши белгиланган.
Конституциявий суднинг ушбу қарори янги Конституция қабул қилинишидан аввалги даврда шаклланган президентлик ваколатларининг янги конституциявий тартиб билан уйғунлашувига ҳуқуқий аниқлик киритади.
