Жазоирнинг Ўзбекистондаги янги элчиси тайинланди
Бахтиёр Саидов янги элчи Жамила Ашурдан ишонч ёрлиқлари нусхаларини қабул қилди. Томонлар икки давлат ўртасидаги ҳамкорликни кенгайтириш масалаларини муҳокама қилди.
Ўзбекистон ташқи ишлар вазири Бахтиёр Саидов Жазоирнинг Ўзбекистондаги янги тайинланган Фавқулодда ва мухтор элчиси Жамила Ашурдан ишонч ёрлиқлари нусхаларини қабул қилди.
Маълум қилинишича, учрашувда Ўзбекистон ва Жазоир ўртасидаги ҳамкорликнинг бугунги ҳолати ҳамда уни янада ривожлантириш истиқболлари муҳокама қилинди.
Томонлар 2026 йил июнь ойида Ўзбекистон делегациясининг Жазоирга амалга оширган расмий ташрифи якунлари ва эришилган келишувларни амалиётга татбиқ этиш масалалари юзасидан фикр алмашди.
Шунингдек, савдо-иқтисодий, инвестиция, таълим, маданият ва бошқа истиқболли йўналишларда икки томонлама ҳамкорликни фаоллаштиришга тайёрлик билдирилди.
Учрашув якунида Бахтиёр Саидов Жамила Ашурга Ўзбекистондаги дипломатик фаолиятида муваффақият тилади.
