Қашқадарёда Nexia-2 автомобилидаги газ баллони портлади, бир киши ҳалок бўлди
Яна икки нафар фуқаро турли даражадаги тан жароҳатлари олган.
Қашқадарё вилояти Муборак туманида ҳаракатланаётган Nexia-2 русумли автомобилга ўрнатилган метан газ баллони ёрилиши оқибатида бир киши ҳалок бўлди.
Қашқадарё вилояти Фавқулодда вазиятлар бошқармаси маълумотига кўра, ҳодиса 8 июль куни соат 07:32 атрофида Муборак тумани «Қурувчилар» МФЙ ҳудудидан ўтувчи А-380 «Қарши–Бухоро» автомобиль йўлининг 128-километрида содир бўлган.
Дастлабки маълумотларга кўра, Қарши шаҳридан Бухоро вилояти томон ҳаракатланаётган, Бухоро вилояти Қоровулбозор туманида яшовчи, 1972 йилда туғилган фуқаро бошқарувидаги Nexia-2 автомобилига ўрнатилган метан газ баллони портлаган.
Ҳодиса оқибатида автомобилда бўлган бир нафар фуқаро воқеа жойида вафот этган. Яна икки нафар фуқаро турли даражадаги тан жароҳатлари олиб, Муборак тумани тиббиёт бирлашмасига ётқизилган.
Қайд этилишича, ҳодиса оқибатида ёнғин содир бўлмаган.
Ҳозирда мазкур ҳолат юзасидан Муборак тумани Ички ишлар бўлими томонидан суриштирув ишлари олиб борилмоқда.
