Ўзбекистонда июлнинг иккинчи ярмида ҳаво ҳарорати одатдагидан юқори бўлиши мумкин
Ҳарорат айрим ҳудудларда 45 даражагача етиши мумкин.
Ўзбекистон йилнинг энг иссиқ даврига кириб бормоқда. Июль ойининг иккинчи ярмида ҳаво ҳарорати иқлимий меъёрдан юқори бўлади, айрим ҳудудларда эса 45 даражагача етиши мумкин. Бу ҳақда Экология ва иқлим ўзгариши миллий қўмитаси хабар берди.
Маълум қилинишича, июль анъанавий равишда республикадаги энг иссиқ ой ҳисобланади. Ўртача кундузги ҳаво ҳарорати 35–37 даражани, жанубий ва чўл ҳудудларида эса 38–40 даражани ташкил этади. Кучли иссиқ тўлқинлари кузатиладиган даврларда ҳарорат 40–42 даражагача, айрим жойларда эса 43–45 даражагача кўтарилиши мумкин.
Қайд этилишича, сўнгги йилларда мамлакатда ўта иссиқ кунлар сони ортиб бормоқда. Ўтган ўн йилликдаги барча июль ойлари иқлимий меъёрдан иссиқроқ бўлган, уларнинг тўққизтаси эса метеорологик кузатувлар тарихидаги энг иссиқ ўнта июль қаторидан жой олган.
Прогнозларга кўра, июлнинг биринчи ўн кунлиги охирига келиб кундузги ҳаво ҳарорати 37–40 даражагача, жанубий ҳудудларда эса 41–43 даражагача кўтарилади. Ой охиригача ҳарорат 33–38 даражадан 38–43 даражагача ўзгариб туради, шимолий, чўл ва жанубий ҳудудларнинг айрим жойларида эса 45 даражагача етиши мумкин.
Шунингдек, июль ойининг ўртача ҳарорати иқлимий меъёрдан 1,5–3 даражага юқори бўлиши кутилмоқда. Ой асосан қуруқ об-ҳаво билан ўтади, ёғингарчилик меъёрдан кам бўлади. Фақат айрим тоғолди ва тоғли ҳудудларда қисқа муддатли ёмғир ҳамда момақалдироқ кузатилиши мумкин.
Мутахассислар аҳолини узоқ вақт қуёш остида қолмасликка, етарли миқдорда суюқлик истеъмол қилишга ҳамда болалар, кексалар ва сурункали касаллиги бор фуқаролар саломатлигига алоҳида эътибор қаратишга чақирмоқда.
