“Омскдаги дрон ҳужумларига алоқамиз йўқ” — Қозоғистон ТИВ
Ташқи ишлар вазирлиги Омск вилоятига ҳужум қилган дронлар мамлакат ҳудудидан учирилгани ҳақидаги хабарларни рад этиб, бундай даъволар ҳеч қандай далил билан тасдиқланмаганини билдирди.
Қозоғистон Ташқи ишлар вазирлиги Россиянинг Омск вилоятига ҳужум қилган учувчисиз учиш аппаратлари мамлакат ҳудудидан учирилгани ҳақидаги хабарларни қатъиян рад этди.
Вазирликнинг Tengrinews'га маълум қилишича, айрим оммавий ахборот воситалари ва ижтимоий тармоқларда тарқалган, дронлар Қозоғистон ҳудудидан учирилгани ҳамда кейинчалик Россиянинг Омск вилоятига зарба бергани ҳақидаги даъволар ҳақиқатга тўғри келмайди ва ҳеч қандай ишончли далил ёки фактлар билан тасдиқланмаган.
“Ушбу даъволар ҳақиқатга тўғри келмайди ва ҳеч қандай маълумот ёки фактлар билан тасдиқланмаган. Биз бундай хабарларни Қозоғистон ва Россия ўртасидаги анъанавий дўстона муносабатларни бузиб кўрсатишга қаратилган асоссиз иддаолар деб ҳисоблаймиз. Икки давлат ўртасидаги алоқалар кенг қамровли стратегик шериклик ва иттифоқчилик руҳида изчил ривожланмоқда”, — дейилади вазирлик баёнотида.
Шунингдек, Ташқи ишлар вазирлиги Қозоғистон ўз ҳудуди, ҳаво макони ва инфратузилмасидан бошқа давлатларга қарши қаратилган ҳар қандай ҳарбий ёки ноқонуний ҳаракатларни амалга ошириш учун фойдаланилишига қатъиян йўл қўймаслигини таъкидлаган.
Вазирлик мамлакат халқаро ҳуқуқ нормаларига риоя этиши, тинчликпарвар ташқи сиёсат юритиши ҳамда халқаро ва минтақавий хавфсизликни таъминлаш бўйича ўз зиммасидаги мажбуриятларни изчил бажариб келаётганини қайд этган.
Эслатиб ўтамиз, 6 июль куни Россиянинг Омск вилоятида учувчисиз учиш аппаратлари ҳужуми қайд этилган эди. Вилоят губернатори Виталий Хотсенконинг маълум қилишича, бир нечта дрон Омскнинг шимолий саноат ҳудудига етиб борган, кейинчалик уларнинг нефтни қайта ишлаш заводига ҳужум қилгани билдирилган. Расмий маълумотларга кўра, ҳодиса оқибатида қурбонлар бўлмаган, дронларнинг аксарияти ҳаво ҳужумидан мудофаа тизимлари томонидан зарарсизлантирилган.
