Тошкентда Таиланддан олиб келинган 11 килограмм наркотик аниқланди
Қозоғистон фуқароси наркотик воситаларни транзит йўли орқали етказиб беришга уринган вақтида қўлга олинган.
Республика миқёсида ўтказилаётган “Хавфсиз ва соғлом юрт” кенг қамровли тезкор-профилактик тадбирларининг иккинчи босқичи доирасида Давлат хавфсизлик хизмати ҳамда божхона органлари ҳамкорлигида йирик миқдордаги гиёҳвандлик воситасининг ноқонуний айланмасига чек қўйилди. Бу ҳақда ДХХ маълум қилди.
Маълум қилинишича, Тошкент шаҳрининг Чилонзор туманида ўтказилган тезкор тадбир давомида 2004 йилда туғилган Қозоғистон Республикаси фуқаросининг спорт сумкаси белгиланган тартибда кўздан кечирилган.
Текширув давомида сумка ичидан ширинликлар ва бошқа маҳсулотлар кўринишида яширилган, умумий оғирлиги тахминан 11 килограмм бўлган гашиш мойи аниқланиб, ашёвий далил сифатида расмийлаштириб олинган.
Дастлабки маълумотларга кўра, ушбу гиёҳвандлик воситаси Таиланддан олиб келинган бўлиб, уни транзит йўли орқали Қозоғистон Республикасига етказиб бериш режалаштирилган.
Мазкур ҳолат юзасидан гумонланувчига нисбатан жиноят иши қўзғатилиб, айни пайтда тергов ҳаракатлари давом эттирилмоқда.
