Эронда Али Хоманаийнинг дафн маросими якунланди
Марҳум Имом Ризо мақбарасига дафн этилди, маросимга унинг тўнғич ўғли бошчилик қилган.
Эрон давлат телерадиокомпанияси (ИРИБ) маълумотига кўра, собиқ олий раҳбар Али Хоманаий мамлакат шимоли-шарқидаги Машҳад шаҳрида жойлашган Имом Ризо мақбараси ҳудудига дафн этилди.
Кўчаларда мотам иштирокчилари сонининг жуда кўплиги сабабли марҳумнинг тобути дафн этиладиган жойга вертолёт орқали олиб борилган. Дафн маросимига унинг тўнғич ўғли оятуллоҳ Мустафо Хоманаий бошчилик қилди.
Шу билан бирга, Теҳрон, Қум ҳамда Ироқнинг шиалар учун муқаддас саналган Нажаф ва Карбало шаҳарларида бир ҳафта давом этган мотам тадбирлари ҳам якунланган. Маҳаллий оммавий ахборот воситалари ҳисоб-китобларига кўра, хотира маросимларида 41–43 миллион киши иштирок этган.
86 ёшли Али Хоманаий 28 февраль куни АҚШ ва Исроилнинг Эронга уюштирган ҳужумларининг биринчи кунида ўз қароргоҳига берилган зарба оқибатида ҳалок бўлган эди.
У 1981–1989 йилларда Эрон президенти, 1989 йилдан бошлаб эса мамлакатнинг олий раҳбари лавозимида фаолият юритган.
Хоманаийнинг вафотидан сўнг олий раҳбар лавозимини унинг ўғли Можтаба Хоманаий эгаллагани маълум қилинган эди. Расмий маълумотларга кўра, у тайинланганидан буён жамоатчилик олдида кўриниш бермаган.
