Собиқ мактаб директори Гулираъно Қосимова суд қарори билан лавозимига тикланди
Фуқаролик ишлари бўйича Фарғона туманлараро суди иш берувчининг ходимни ишдан бўшатиш ҳақидаги буйруғини ғайриқонуний деб топди.
Собиқ мактаб директори Гулираъно Қосимова фуқаролик ишлари бўйича Фарғона туманлараро судининг ҳал қилув қарори билан аввалги иш жойига тикланди. Суд, шунингдек, унинг мажбурий прогул даври учун уч ойлик иш ҳақи ундирилиши ҳақида ҳам қарор чиқарди.
Қосимованинг айтишича, у ишдан ноқонуний бўшатилгани юзасидан судга даъво аризаси билан мурожаат қилган. Суд иш материалларини ўрганиб, иш берувчининг уни ишдан бўшатиш ҳақидаги буйруғини ғайриқонуний деб топган ҳамда даъвогарнинг талабларини қаноатлантирган.
Гулираъно Қосимова суд қарори билан бузилган меҳнат ҳуқуқлари тикланганини билдириб, суд тизимига миннатдорлик изҳор этди. Унинг таъкидлашича, мазкур жараён судларга бўлган ишончини янада мустаҳкамлаган.
"Суд менинг ҳуқуқларимни тиклади ва адолат қарор топди. Судьялар ишни холис ва қонун асосида кўриб чиқди", деди у.
Қосимова, шунингдек, суд ҳокимияти фаолияти ҳамда фуқароларнинг ҳуқуқларини ҳимоя қилиш борасидаги ислоҳотларни эътироф этиб, судьяларга, давлат раҳбарига миннатдорлик билдирди.
Фурқат туманидаги мактаб директори ИИБ ва Солиқ бошлиқлари муносабати қурбони бўлган эди.
