Сурхондарё ва Фарғонада ноқонуний диний таълим берганлар аниқланди
Умумий 27 нафар вояга етмаган болаларга тегишли рухсатномаларсиз диний таълим бериб келинган.
Давлат хавфсизлик хизмати ва Ички ишлар органлари ходимлари ҳамкорлигида ўтказилган тезкор тадбирда вояга етмаган болаларга ноқонуний диний таълим бериш ҳолатлари фош этилди. Бу ҳақда ДХХ хабар берди.
Маълум қилинишича, Сурхондарё вилоятининг Денов туманида яшовчи, 1985 йилда туғилган муқаддам судланган фуқаро ҳеч қандай диний маълумотга ҳамда диний таълим бериш учун зарур рухсатномаларга эга бўлмаган ҳолда жорий йилнинг июнь ойидан бошлаб ўз хонадонида диний сабоқ бериб келган.
Тезкор тадбир давомида унинг уйидан Денов ва Олтинсой туманларидан келган, 2011-2019 йилларда туғилган 22 нафар вояга етмаган болаларга ноқонуний диний таълим берилгани аниқланган. Шунингдек, болалар санитария-гигиена талабларига жавоб бермайдиган шароитда яшаб, бунинг эвазига уларнинг ота-оналаридан ҳар ой 500 минг сўмдан 100 АҚШ долларигача ундирилгани маълум бўлган.
Яна бир ҳолат Фарғона вилоятининг Риштон туманида қайд этилган. 1971 йилда туғилган аёл ўз яшаш хонадонида Бағдод ва Язёвон туманларидан келган, 2011-2017 йиллардан туғилган 5 нафар вояга етмаган болаларга ҳеч қандай рухсатномасиз диний таълим бераётгани аниқланган.
Холислар иштирокида ўтказилган кўздан кечириш жараёнида таълим беришда фойдаланилган адабиётлар ашёвий далил сифатида олиб қўйилган.
Ҳар икки ҳолат юзасидан мазкур фуқароларга нисбатан Жиноят кодексининг 229²-моддаси 2-қисми билан жиноят ишлари қўзғатилган.
Болаларнинг ота-оналарига нисбатан эса Маъмурий жавобгарлик тўғрисидаги кодекснинг 47-моддаси асосида маъмурий чоралар кўрилган ҳамда улар билан профилактик суҳбатлар ўтказилган.
