Москвада довул оқибатида метро бекатини сув босди, икки кишини чақмоқ урди
Об-ҳавонинг ёмонлашишига "Бернадетт" ва Каспий денгизи томондан ҳаракатланаётган "Каспиец" циклонларининг қўшилиши сабаб бўлган.
11 июль оқшомида Москва ва Москва вилоятида кучли жала, йирик дўл ҳамда довул кузатилди. Ноқулай об-ҳаво оқибатида метро бекатини сув босди, дарахтлар қулаши сабаб трамвайлар ҳаракати тўхтади, икки кишини эса чақмоқ урди. Бу ҳақда Meduza хабар берди.
Маълумотларга кўра, об-ҳавонинг кескин ёмонлашишига Шимолий Атлантикадан келаётган "Бернадетт" ва Каспий денгизи томондан ҳаракатланаётган "Каспиец" циклонларининг қўшилиши сабаб бўлган.
Довул оқибатида "Трубная" метро бекати вестибюлини сув босган. Верхний Сусалний тор кўчасида дарахтлар қулагани сабаб трамвайлар қатнови тўхтатилган. Шунингдек, "Винзавод" мажмуасидаги бинолардан бирининг томи учиб кетган, шаҳар марказидаги бир нечта ёзги айвонлар зарар кўрган.
Варшава шоссесидаги "Труд" стадионида футбол томоша қилаётган икки эркакни чақмоқ урган. Оқибатда улар ҳушидан кетган.
Синоптиклар прогнозига кўра, кучли ёғингарчилик душанбагача давом этади. Шу вақт ичида Москва ҳудудига июль ойидаги ёғин меъёрининг 90 фоизигача ёғиши мумкин.
Москва шаҳар маъмурияти аҳолини зарурат бўлмаса шахсий автомобилдан фойдаланмасликка ҳамда метро орқали ҳаракатланишга чақирди. Кучли жала шанба оқшомида Санкт-Петербург шаҳрида ҳам кузатилди.
