Ўзбекистонда буғдойдан бўшаган далаларни ёққан 172 киши жаримага тортилди
Ҳуқуқбузарларга жами 212,5 миллион сўм миқдорида маъмурий жарима қўлланилган. Табиатга етказилган зарар 652,3 миллион сўм этиб баҳоланган.
Ўзбекистонда буғдойдан бўшаган ер майдонларини ёқиш ҳолатларига қарши назорат кучайтирилди, дея хабар бермоқда Экология ва иқлим ўзгариши миллий қўмитаси.
Маълум қилинишича, қонунбузарликлар аэрокосмик маълумотлар ёрдамида аниқланмоқда. Далаларни ёқишнинг олдини олиш мақсадида ҳудудлардаги 7 760 та фермер хўжалигига огоҳлантириш хатлари юборилган.
Шунингдек, Экополитсия ва “Ўзбеккосмос” агентлиги томонидан олиб борилган мониторинг давомида буғдойдан бўшаган 744 та ер майдонида ёнғин ҳолати аниқланган. Давлат экология инспекторлари томонидан ўтказилган текширувлар якунида 172 нафар ҳуқуқбузарга 212,5 миллион сўм миқдорида маъмурий жарима қўлланилган. Бундан ташқари, табиатга етказилган зарар 652,3 миллион сўм этиб баҳоланган.
Қўмита маълумотига кўра, жорий йил бошидан буён дала ва аҳоли пунктларида анғиз, хазон, шох-шабба ҳамда бошқа ўсимлик қолдиқлари, шунингдек, қурилиш чиқиндиларини ёқиш билан боғлиқ 9 821 та ҳуқуқбузарлик аниқланиб, улар бўйича белгиланган тартибда маъмурий баённомалар расмийлаштирилган.
Экология ва иқлим ўзгариши миллий қўмитаси фуқаролар ҳамда фермер хўжаликларини ғалладан бўшаган майдонларда сомонпояларни ёқмасликка ва бундай ҳолатларга йўл қўймасликка чақирди.
