Европада жазирама сабаб 10 мингдан ортиқ одам вафот этди
Иссиқ билан боғлиқ ўлимларнинг 9 мингдан ортиғи 65 ёш ва ундан катта фуқаролар орасида қайд этилган.
Европада июнь ойи охирида кузатилган аномал иссиқ тўлқини оқибатида 10 мингдан ортиқ одам вафот этди. Бу ҳақда Европа Касалликларнинг олдини олиш ва назорат қилиш маркази (ECDC) ҳамда Жаҳон соғлиқни сақлаш ташкилоти (ЖССТ) кўмагида фаолият юритувчи EuroMOMO мониторинг дастури маълум қилди.
Ҳисоботга кўра, иссиқ билан боғлиқ ўлимларнинг 9 мингдан ортиғи 65 ёш ва ундан катта фуқаролар ҳиссасига тўғри келган. Мутахассислар таъкидлашича, юқори ҳарорат нафақат иссиқ уришига, балки юрак-қон томир ҳамда нафас йўллари касалликларининг оғирлашишига ҳам сабаб бўлади. Айниқса, кекса ёшдагилар бундай об-ҳаво шароитида энг хавфли гуруҳ ҳисобланади.
Тадқиқот давомида Европанинг 27 давлати миллий статистикаси таҳлил қилинган. Ҳисоботда мамлакатлар кесимида батафсил рақамлар келтирилмаган бўлсада, июнь ойининг сўнгги ҳафтасида Франция ва Бельгияда ўта юқори ортиқча ўлим кўрсаткичлари қайд этилгани маълум қилинган.
Германиянинг Роберт Кох институти маълумотларига кўра, июнь ойи охирига келиб мамлакатда жазирама сабаб тахминан 5 100 киши вафот этган. Шундан 4 310 нафари 22–28 июнь кунлари кузатилган энг иссиқ ҳафта ҳиссасига тўғри келади.
Буюк Британиядаги Лондон Империал коллежи тадқиқотига кўра эса, июнь ойининг охирида биргина Англия ва Уэлсда қарийб 2 700 киши иссиқ тўлқини оқибатида ҳаётдан кўз юмган.
Шунингдек, ушбу илмий гуруҳ ҳисоб-китобларига кўра, аномал иссиқ Европанинг 12 та йирик шаҳрида қарийб 2 300 кишининг ўлимига сабаб бўлган. Иссиқ туфайли энг кўп ўлим ҳолатлари Милан, Париж ва Барселона шаҳарларида қайд этилган.
