Қирғизистон Президентининг қизи оммага кўриниш берди
Садир Жапаров бу пиар ёки сиёсатга аралашишга уриниш эмаслигини айтди.
Қирғизистон президенти Садир Жапаров ижтимоий тармоқларда қизи Жанайимнинг “Олтин Болалик” реабилитация марказида болаларга совғалар улашаётгани акс этган видео юзасидан изоҳ берди. Бу ҳақда 24.kg хабар берди.
Президентнинг айтишича, бу ҳолат на пиар, на қизини сиёсатга жалб этишга уриниш билан боғлиқ. Жапаров бу ҳақда “Кабар” ахборот агентлигига берган интервьюсида сўз очиб, фарзандлари ва яқинларини сиёсат ҳамда давлат ишларига аралаштирмаслигини таъкидлади. Унинг сўзларига кўра, агар бундай уринишлар бўлганида, бу аллақачон жамоатчиликка маълум бўларди.
Президентнинг маълум қилишича, “Олтин Болалик” болалар реабилитация маркази унинг топшириғи билан уч йил аввал тўлиқ қуриб битказилган ва зарур жиҳозлар билан таъминланган. Ҳозир у ерда ҳар йили Қирғизистоннинг барча ҳудудларидан, аввало кам таъминланган оилалар фарзандлари соғломлаштирилади.
Жапаров унинг рафиқаси Айгул Жапарова ҳар йили марказдаги болаларга совғалар топширишини айтди. Бу йил у марказга бора олмагани сабабли совғаларни қизи Жанайим олиб борган. У болаларга кийимларни топширгач, дарҳол ортга қайтган.
Президентнинг таъкидлашича, тадбирни оммавий ёритиш режалаштирилмаган, унда ОАВ вакиллари ҳам иштирок этмаган. Видеони тадбир иштирокчиларидан бири телефонида тасвирга олиб, кейинчалик ижтимоий тармоқларга жойлаштирган.
Жапаров ушбу воқеадан сиёсий мақсадларда фойдаланмасликка чақирди.
