Трамп АҚШ Ҳормузнинг “қўриқчиси” бўлишини айтди
Доналд Трамп бўғоз орқали ташиладиган юклардан 20 фоиз миқдорида бож ундириш режасини маълум қилди. Эрон эса буни рад этди.
АҚШ президенти Доналд Трамп Қўшма Штатлар Эронга қарши денгиз блокадасини қайта тиклаши, Ҳормуз бўғози хавфсизлигини назорат қилиши ҳамда бўғоз орқали ташиладиган юклардан 20 фоиз миқдорида тўлов ундирилишини маълум қилди. Эрон эса бу режани қатъиян рад этиб, АҚШнинг бўғоз бошқарувига аралашувига йўл қўймаслигини билдирди.
Al Jazeera хабарига кўра, Трамп бу ҳақда Fox News телеканалига берган интервьюсида ва Truth Social ижтимоий тармоғидаги саҳифасида маълум қилди. Унинг айтишича, АҚШ Эронга қарши денгиз блокадасини қайта тиклайди ва бундан буён Ҳормуз бўғозининг "қўриқчиси" сифатида фаолият юритади. Шу билан бирга, бўғоз орқали ташиладиган барча юклардан хавфсизликни таъминлаш харажатларини қоплаш мақсадида 20 фоизлик тўлов ундирилиши режалаштирилмоқда.
БМТнинг Халқаро денгиз ташкилоти (IMO) эса халқаро навигация учун фойдаланиладиган бўғозлардан ўтиш учун тўлов жорий этилишига қарши чиқди. Ташкилот бундай мажбурий тўловларни жорий этиш учун халқаро ҳуқуқий асос мавжуд эмаслигини билдирди.
Сўнгги баёнотлар АҚШ ва Эрон ўртасидаги кескинлик яна кучайган бир пайтда янгради. Томонлар бир-бирига навбатдаги зарбаларни берганини маълум қилган. Эрон Баҳрайн, Қувайт, Уммон ва Иорданиядаги АҚШ ҳарбий объектларига ҳужум уюштирганини билдирган бўлса, АҚШ кучлари Эрон қирғоғидаги порт шаҳарларга зарбалар бераётганини маълум қилган.
Эрон АҚШнинг Ҳормуз бўғози устидан назорат ўрнатиш режасини яна бир бор рад этди.
Мамлакат Қуролли кучлари марказий қўмондонлиги Вашингтоннинг бундай ҳаракати Эрон суверенитетига тажовуз сифатида баҳоланишини ва бунга қатъий жавоб қайтарилишини маълум қилди.
Мутахассислар сўнгги кескинлик фонида дунё нефть ва газ экспортининг қарийб 20 фоизи ўтадиган Ҳормуз бўғози орқали ҳаракатланаётган тижорат кемалари сони сезиларли даражада камайганини қайд этмоқда.
