Ўзбекистон ва Қирғизистон туризм соҳасида ҳамкорликни кенгайтиради
Томонлар ўзаро туристлар оқимини ошириш, қўшма туристик йўналишларни йўлга қўйиш ҳамда туризм соҳасидаги ҳамкорликни кенгайтириш масалаларини муҳокама қилди.
Ўзбекистон Республикаси Туризм қўмитаси раиси А. Аққулов Қирғизистон Туристик ташкилотлар ассоциацияси (КАТО) ижрочи директори Н. Сапаров ҳамда икки мамлакатнинг етакчи туроператорлари иштирокида учрашув бўлиб ўтди.
Учрашувда ўзаро туристлар оқимини кўпайтириш, қўшма туристик маршрутларни ишлаб чиқиш, шунингдек, туроператорлар, меҳмонхона хўжаликлари ва транспорт компаниялари ўртасидаги тўғридан-тўғри ҳамкорликни ривожлантириш масалалари муҳокама қилинди.
Томонлар Ўзбекистоннинг бой тарихий-маданий мероси ва қадимий шаҳарларини Қирғизистоннинг ноёб табиати, тоғ ва экотуризм имкониятлари билан ўзаро боғлайдиган саёҳат дастурларини шакллантириш хорижий сайёҳлар учун жозибадор ва рақобатбардош таклиф яратишини қайд этдилар.
КАТО билан ҳамкорлик доирасида икки мамлакат туризм соҳаси вакиллари учун ўзаро инфотурлар ташкил этиш, "Ўзбекистон – Қирғизистон" қўшма туристик маршрутларини халқаро бозорларга олиб чиқиш ҳамда уларни рақамли платформалар ва оммавий ахборот воситалари орқали кенг тарғиб қилиш юзасидан фикр алмашилди.
Шу билан бирга, дунёнинг йирик халқаро туризм кўргазма ва ярмаркаларида Ўзбекистон ва Қирғизистоннинг сайёҳлик имкониятларини "Марказий Осиё" ягона минтақавий бренди остида тақдим этиш, қўшма миллий стендлар, тақдимотлар ва маркетинг тадбирларини ташкил қилиш истиқболлари кўриб чиқилди. Бундай ёндашув минтақанинг бой тарихий мероси, маданий ранг-баранглиги ва табиий салоҳиятини ягона сайёҳлик йўналиши сифатида халқаро аудиторияга намойиш этиш имконини беради.
Учрашув якунида учинчи мамлакатлардан сайёҳларни жалб қилиш, Бишкекдан Самарқанд ва Урганч шаҳарларига йўлга қўйилиши режалаштирилаётган тўғридан-тўғри авиақатновларни фаол тарғиб этиш ҳамда икки давлат туризм бизнеси вакиллари ўртасидаги амалий ҳамкорликни тизимли равишда давом эттириш бўйича келишувга эришилди.
Белгиланган ташаббусларнинг амалга оширилиши Ўзбекистон ва Қирғизистон ўртасидаги туристик алмашинувни кенгайтириш, саёҳатлар географиясини бойитиш ҳамда Марказий Осиёнинг халқаро туризм бозоридаги нуфузи ва жозибадорлигини оширишга хизмат қилади.
