Ўзбекистон ва Греция 2026–2028 йилларга мўлжалланган маданий ҳамкорлик дастурини имзолади
Искандар Македонский ва Роксана тарихига бағишланган қўшма бадиий фильм яратиш ташаббуси илгари сурилди.
Ўзбекистон Республикаси Маданият вазири Озодбек Назарбеков хизмат сафари доирасида Грецияда бўлиб, Греция маданият вазири Лина Мендони билан музокаралар ўтказди.
Афина шаҳрида бўлиб ўтган учрашув якунида Ўзбекистон ва Греция ҳукуматлари ўртасида 2026–2028 йилларга мўлжалланган Маданий ҳамкорлик дастури имзоланди. Томонлар ҳужжат икки давлат ўртасидаги маданий-гуманитар алоқаларни тизимли ривожлантириш, тажриба алмашиш ва қўшма лойиҳаларни амалга ошириш учун ҳуқуқий асос бўлиб хизмат қилишини таъкидлади.
Музокараларда ҳамкорлик дастурининг амалий ижросини таъминлаш мақсадида қўшма “Йўл харитаси”ни ишлаб чиқишга келишиб олинди. Унда амалга ошириладиган тадбирлар, муддатлар ва масъул ташкилотлар белгиланади.
Шунингдек, томонлар Грецияда “Ўзбекистон маданияти ҳафталиги” ва Ўзбекистонда “Греция маданияти ҳафталиги”ни мунтазам ўтказиш ташаббусини қўллаб-қувватлади. Ушбу тадбирлар доирасида концертлар, театр томошалари, кўргазмалар, кино кунлари, ҳунармандчилик ва миллий таомлар тақдимотларини ташкил этиш режалаштирилган.
Учрашувда музейлар ўртасидаги стратегик шерикликни ривожлантириш, тарихий-маданий асраш, қўшма кўргазмалар ва реставрация лойиҳаларини амалга ошириш масалалари ҳам муҳокама қилинди.
Бундан ташқари, Ўзбекистон ва Греция олимлари иштирокида қўшма археологик экспедицияларни ташкил этиш, шунингдек, Искандар Македонский ва Роксана тарихига бағишланган қўшма бадиий фильм яратиш ташаббуси илгари сурилди.
Томонлар ёш ижодкорлар, дизайнерлар, мусиқачилар ва санъат вакиллари учун алмашинув дастурларини йўлга қўйиш ҳамда креатив индустриялар соҳасида янги қўшма лойиҳаларни амалга ошириш юзасидан ҳам фикр алмашди.
Учрашув якунида икки мамлакат вакиллари имзоланган ҳамкорлик дастури Ўзбекистон ва Греция ўртасидаги маданият, санъат, илм-фан ва креатив соҳалардаги узоқ муддатли стратегик шерикликни янада мустаҳкамлашига ишонч билдирди.
