Apple яна дунёдаги энг қиммат компанияга айланди

Apple сунъий интеллект бозоридаги ўзгаришлар фонида Nvidia'ни ортда қолдириб, дунёдаги энг қиммат компанияга айланди.

 

Компаниянинг бозор қиймати 4,88 триллион долларга етган бўлса, Нвидиаънинг бозор капиталлашуви 3,5 фоизга камайиб, 4,86 триллион долларни ташкил этди. Шу тариқа, Apple бир йилдан ортиқ вақтдан сўнг яна дунёдаги энг қиммат компания мақомини қўлга киритди.

 

Nvidia аввалроқ бозор қиймати 5 триллион доллардан ошгач, ушбу рейтингда биринчи ўринга чиққан эди. Ўтган ой Apple сунъий интеллект асосида ишловчи Siri ёрдамчисининг янгиланган версиясини тақдим этди. 

 

Янги тизим фойдаланувчиларнинг сўровларини шахсий контекстни ҳисобга олган ҳолда яхшироқ тушуниши, интернетдан реал вақт режимида маълумот олиши ҳамда мураккаброқ вазифаларни бажариши билан ажралиб туради.

 

Founder ETFs асосчиси Майкл Монаганнинг фикрича, инвесторлар эндиликда сунъий интеллект инфратузилмасига катта маблағ сарфлаётган компаниялардан кўра, ушбу технологияни фойдаланувчилар учун амалий хизматларга айлантира оладиган компанияларга кўпроқ эътибор қаратмоқда. Унинг таъкидлашича, Аpple'нинг AI йўналишидаги нисбатан кам капитал харажатлари энди компания учун устунлик сифатида баҳоланмоқда.

 

Apple акцияларининг ўсиши компаниянинг 30 июль куни эълон қилинадиган учинчи чорак молиявий натижалари арафасида кузатилмоқда. Аввалроқ компания савдо ҳажми 14–17 фоизга ўсишини прогноз қилган эди.

 

Шу билан бирга, Apple бош директори Тим Кук сентабр ойида компания раҳбарлигини 2021 йилдан буён аппарат муҳандислиги бўлимини бошқариб келаётган Жон Тернусга топшириши кутилмоқда.

 

Айни пайтда яримўтказгичлар бозорида рақобат кучаймоқда. Micron компанияси май ойида бозор қийматини 1 триллион доллардан оширган бўлса, Жанубий Кореянинг SK Hynix компанияси Nasdaq биржасида рўйхатдан ўтди.

 

Apple акцияларининг ўсишига қарамай, АҚШ фонд бозори индекслари пасайди. Савдолар давомида Nasdaq 1,6 фоизга, С&P 500 0,9 фоизга, Dow Jones Industrial Average эса 0,25 фоизга тушди.