Тошкентда Оniх ва ЙПХ мотоцикллари тўқнашди: ЙПХ ходими вафот этди
Пойтахтдаги ЙТҲ бўйича ИИВ расмий маълумот берди
Тошкент шаҳрида патруль хизмати мотоцикллари ва енгил автомобиль иштирокида содир бўлган йўл-транспорт ҳодисаси оқибатида бир нафар Йўл-патруль хизмати (ЙПХ) ходими ҳалок бўлди. Бу ҳақда ИИВ Йўл ҳаракати хавфсизлиги хизмати матбуот котиби Зойир Йўлдошев маълум қилди.
Қайд этилишича, ҳодиса 16 июль куни соат тахминан 18:30 да пойтахтнинг “Дўрмон йўли” кўчасида содир бўлган. Уч нафар ЙПХ инспектори патруль мотоциклларида хизмат вазифасини бажараётган вақтда «Ғазалкент» кўчасидан чорраҳага кириб келган Оniх русумли автомобиль билан тўқнашган.
Йўл-транспорт ҳодисаси оқибатида патруль мотоциклини бошқариб келган бир нафар ЙПХ ходими олган тан жароҳатлари сабаб воқеа жойида вафот этган. Тан жароҳати олган бошқа фуқароларга тиббий ёрдам кўрсатилмоқда.
ИИВ Йўл ҳаракати хавфсизлиги хизмати ижтимоий тармоқларда мазкур ҳодиса кортеж кузатуви вақтида содир бўлгани ҳақидаги хабарлар ҳақиқатга тўғри келмаслигини билдириб, асоссиз маълумотларни тарқатмасликка чақирди.
Ҳозирда ҳодиса юзасидан терговга қадар текширув ҳаракатлари олиб борилмоқда.
