Норвегияда сўнгги 100 йилдаги энг йирик ёнғин юз берди
Ҳодиса сабаб юзлаб аҳоли эвакуация қилинди.
Норвегиянинг Драммен муниципалитетига қарашли Крокстаделва қишлоғида юз берган йирик ёнғин оқибатида 100 дан ортиқ турар жой ёниб кетди. Бу ҳақда Aftenposten нашри хабар берди.
Маълум қилинишича, ёнғин аввал қишлоқда бошланган, кейинчалик яқин атрофдаги ўрмонга тарқалган. Маҳаллий ОАВ бу ҳодисани Норвегияда сўнгги 100 йил ичидаги энг йирик ёнғин деб баҳоламоқда.
Ёнғин сабаб юзлаб одамлар хавфсиз ҳудудларга эвакуация қилинган. Ҳозирча бедарак йўқолганлар ҳақида маълумот йўқ. Икки нафар маҳаллий фуқаро ёниш маҳсулотларидан заҳарланиш оқибатида шифохонага ётқизилган.
Reuters агентлигининг ёзишича, кучли шамол ёнғинни тез тарқатган, қалин қора тутун эса Ослодан тахминан 50 километр ғарбдаги ҳудудни қоплаган.
Aftenposten маълумотига кўра, маҳаллий ёнғин-қутқарув хизмати вазиятни назоратга олиш учун Норвегия ҳукуматидан қўшимча ёрдам сўраган.
“Биз ҳали ҳам ёнғинни тўлиқ назорат остига олганимиз йўқ”, — деди Драммен муниципалитети ёнғин хизмати раҳбари Инге Вергеланд.
