Аномал иссиқ автобуслардаги кондиционерлар самарадорлигига таъсир қилмоқда — "Тошшаҳартрансхизмат"
"Тошшаҳартрансхизмат" АЖ автобуслардаги совитиш тизимлари юзасидан билдирилаётган эътирозларга муносабат билдириб, айрим автобусларда кондиционер мавжуд эмаслигини маълум қилди.
"Тошшаҳартрансхизмат" АЖ сўнгги кунларда автобуслардаги кондиционерлар фаолияти юзасидан ижтимоий тармоқларда тарқалаётган танқидий мурожаатларга изоҳ берди.
Маълум қилинишича, бугунги кунда корхона автобус саройлари филиаллари тасарруфида ҳар куни 1672 та автобус ва электробус йўналишларга чиқарилмоқда. Йўловчиларга Mercedes-Benz, SAZ LE-60, МАN, Yutong ҳамда King Long русумидаги транспорт воситалари хизмат кўрсатмоқда.
Ҳаракат таркибидаги 102 та Mercedes-Benz автобусининг барчаси, 272 та МАN автобусининг 100 таси ҳамда 201 та SAZ LE-60 автобусининг 88 таси ишлаб чиқарувчи завод томонидан салонни совитиш тизими билан жиҳозланмаган.
Шунингдек, Тошкент шаҳрида кузатилаётган 45 даража ва ундан юқори аномал иссиқ, автобус салонига қуёш нурларининг тўғридан-тўғри тушиши, бекатларда эшикларнинг тез-тез очилиб-ёпилиши ва йўловчилар сонининг кўплиги Ютонг ҳамда King Long русумидаги автобус ва электробуслардаги кондиционер тизимларига қўшимча юклама бераётгани қайд этилди.
Қайд этилишича, бундай экстремал об-ҳаво шароитида техник жиҳатдан соз кондиционерлар ҳам номинал совитиш қувватини тўлиқ таъминлай олмаслиги мумкин. Шу боис ёзнинг аномал иссиқ кунларида совитиш самарадорлигининг пасайиши кўп ҳолларда ускунанинг носозлиги эмас, балки юқори ҳарорат шароитида ишлаш ва иссиқлик алмашинуви самарадорлигининг пасайиши билан боғлиқ табиий техник ҳолат экани таъкидланди.
"Тошшаҳартрансхизмат" АЖ йўловчилар учун қулай шароит яратиш бўйича барча имкониятлар ишга солинаётганини билдириб, об-ҳаво билан боғлиқ ушбу вақтинчалик ноқулайликни тушунишларини сўради.
