Испания 2026 йилги FIFА Жаҳон чемпионатида ғолиб бўлди
Терма жамоаси финалда Аргентинани 1:0 ҳисобида мағлуб этиб, тарихида иккинчи бор Жаҳон чемпионлигини қўлга киритди.
Испания миллий терма жамоаси АҚШ, Канада ва Мексикада ўтказилган 2026 йилги FIFА Жаҳон чемпионати финалида Аргентина устидан 1:0 ҳисобида ғалаба қозониб, тарихида иккинчи бор жаҳон чемпионига айланди.
АҚШнинг Нью-Жерси штатидаги MetLife стадионида бўлиб ўтган ҳал қилувчи учрашувнинг асосий вақтида ҳисоб очилмади. Баҳс қўшимча бўлимларгача давом этди ва 106-дақиқада ярим ҳимоячи Ферран Торрес киритган гол Испанияга чемпионликни тақдим этди.
Аргентина эса 90+3-дақиқадан бошлаб бир киши кам бўлиб ҳаракат қилди. Ярим ҳимоячи Энсо Фернандес иккинчи сариқ карточка олиб майдондан четлатилди.
Шу тариқа Испания 2010 йилдан кейин яна FIFА Жаҳон чемпионлигини қўлга киритди. Аргентина эса тарихидаги еттинчи финалда мағлубиятга учради. Жанубий америкаликлар бунгача 1978, 1986 ва 2022 йилларда жаҳон чемпиони бўлган эди.
Лионель Месси 39 ёшида Жаҳон чемпионати финалида майдонга тушган энг ёши катта майдон футболчисига айланди. Испаниянинг 19 ёшли ҳужумчиси Ламин Ямал эса мундиал финалларида майдонга тушган энг ёш футболчилар қаторидан жой олди.
