Россия Ўзбекистондан бир неча турдаги сабзавот ва мевалар олиб киришни чеклади
Чеклов фитосанитария қоидаларини энг кўп бузган бешта ўзбекистонлик экспортчига нисбатан жорий этилди.
Росселхознадзор фитосанитария қоидабузарликлари аниқлангани сабабли Ўзбекистоннинг беш экспортчисига Россияга айрим мева ва сабзавот маҳсулотларини етказиб беришга чеклов жорий қилди.
Росселхознадзор маълум қилишича, қарор карантин остидаги маҳсулотларни олиб киришда карантин объектлари аниқланиш ҳолатлари кўпайгани муносабати билан қабул қилинган.
Чеклов оқ карам, гулкарам, бош пиёз, шивит, петрушка, узум, лавлаги ва помидор маҳсулотларини қамраб олади. У фақат фитосанитария қоидаларини энг кўп бузган беш нафар экспортчига нисбатан қўлланади.
Идора маълумотига кўра, 2026 йил бошидан буён мазкур маҳсулотларда 132 та карантин объекти аниқланган. Улар орасида помидор мевасининг жигарранг буришиш вируси, Жанубий Америка помидор куяси, ғарбий (Калифорния) гул трипси ҳамда томирларнинг некротик сарғайишини келтириб чиқарувчи бенивирус бор.
Росселхознадзор ушбу чекловлар Россия ҳудудига карантин зараркунандалари ва касалликлари кириб келишининг олдини олиш мақсадида жорий этилганини билдирди.
