Мамдани Нетаняхуни ҳибсга олиш ваколати йўқлигини тан олди
Аввалроқ Нетаняхунинг БМТ Бош Ассамблеясига ташрифи вақтида уни ҳибсга олиш эҳтимоли муҳокама қилинганди.
Нью-Ёрк шаҳри мери Зоҳран Мамдани шаҳар маъмуриятида Исроил Бош вазири Бенямин Нетаняхуни Халқаро жиноят суди (ХЖС) ордери асосида ҳибсга олиш бўйича ҳуқуқий ваколат мавжуд эмаслигини маълум қилди.
Мамдани Х ижтимоий тармоғида эълон қилган видеомурожаатида ХЖС қарорини амалга ошириш шаҳарнинг ваколатига кирмаслигини, бироқ бундай ваколат федерал ҳукумат ихтиёрида эканини таъкидлаган.
Шунингдек, у АҚШ федерал ҳукуматини Халқаро жиноят судига қўшилиш ва суд қарорларини ижро этиш масаласини кўриб чиқишга чақирган.
Аввалроқ Мамдани Нью-Ёрк шаҳар Адлия департаменти Бенямин Нетаняху сентябрь ойида БМТ Бош Ассамблеяси тадбирларида иштирок этиш учун шаҳарга ташриф буюрган тақдирда, ХЖС ордерини ижро этиш имкониятларини ўрганаётганини маълум қилганди. Бунга жавобан АҚШ президенти Доналд Трамп Нетаняхунинг АҚШга ташрифи чоғида унинг ҳибсга олиниши мумкин эмаслигини билдирган.
Эслатиб ўтамиз, 2024 йил ноябрь ойида Халқаро жиноят суди Бенямин Нетаняху ва Исроилнинг собиқ мудофаа вазири Ёав Галантни Ғазодаги можарога алоқадор уруш жиноятлари ҳамда инсониятга қарши жиноятларда гумон қилиб, уларни ҳибсга олишга ордер берган эди. Исроил ва АҚШ эса ХЖС юрисдикциясини тан олмайди.
