Туризм қўмитаси “Хавфсиз туризм” жамғармаси бўйича тушунтириш берди

Туризм қўмитаси ижтимоий тармоқларда чиқиш туризми ва соҳадаги янги тартиб-қоидалар ҳақида бир томонлама ҳамда етарлича ўрганилмаган хабарлар тарқалаётгани муносабати билан расмий баёнот билан чиқди.

 

Қўмита маълумотига кўра, сўнгги йилларда аҳоли фаровонлигининг ошиши натижасида хорижга саёҳат қилаётган фуқаролар сони сезиларли кўпайган. Хусусан, 2025 йилда 8 миллиондан ортиқ ўзбекистонлик хорижга саёҳат қилган. Шу сабабли чет элда бўлиб турган фуқароларни фавқулодда вазиятларда эвакуация қилиш, уларга зарур ёрдам кўрсатиш ва Ватанга қайтариш долзарб масалага айлангани таъкидланди.

 

Қайд этилишича, амалдаги қонунчиликка мувофиқ туроператорлар лицензия асосида фаолият юритади, турагентлар эса хабардор қилиш тартибида ишлайди. Таҳлиллар эса айнан турагентлар орқали кафолатсиз сафарга чиққан айрим туристлар хорижда мураккаб вазиятларга дуч келаётганини кўрсатган.

 

Шу муносабат билан “Ўзбекистон Республикаси фуқароларининг хорижий мамлакатлардаги саёҳатларини тартибга солиш билан боғлиқ чора-тадбирларни янада такомиллаштириш тўғрисида”ги норматив-ҳуқуқий ҳужжат лойиҳаси жамоатчилик муҳокамасига тақдим этилган.

 

Қўмита маълум қилишича, лойиҳа Буюк Британия, Германия, Япония, Дания, Россия, Беларус ва Қозоғистон тажрибаси асосида ишлаб чиқилган.

 

Лойиҳада “Хавфсиз туризм” жамғармасини ташкил этиш ҳам назарда тутилган. Унга кўра, туроператорлар учун белгиланиши режалаштирилаётган 50 минг АҚШ доллари миқдоридаги маблағ фавқулодда вазиятларда жабрланган фуқароларга етказилган зарарни қоплаш ҳамда уларни хориждан эвакуация қилиш харажатларини молиялаштиришга йўналтирилади. Мақсадли йиғимлар захира маблағи белгиланган миқдордан ошгач, улар кафолатли равишда қайтарилиши қайд этилган.

 

Шунингдек, қарор лойиҳаси жорий йилнинг 5 июнь ва 6 июль кунлари Туризм қўмитасида маҳаллий ҳамда хорижий туризм соҳаси вакиллари иштирокида ўтказилган очиқ мулоқотларда муҳокама қилиниб, билдирилган таклифлар асосида такомиллаштирилгани билдирилди.

 

Туризм қўмитаси мазкур ҳужжат лойиҳаси фуқароларнинг ҳаёти, хавфсизлиги ва қонуний манфаатларини ҳимоя қилишнинг ҳуқуқий ҳамда молиявий механизмларини яратишга қаратилганини таъкидлаб, жамоатчиликни лойиҳа мазмунини расмий манбалар орқали холис баҳолаш ва муҳокамаларда фаол иштирок этишга чақирди.