Ўзбекистонда ижтимоий иш фаолиятини тартибга солувчи қонун қабул қилинди
Ҳужжат ижтимоий хизматлар ва ёрдам кўрсатиш тизимини такомиллаштириш ҳамда ушбу соҳадаги ваколатли органлар фаолиятини белгилайди.
23 июль куни “Ижтимоий иш тўғрисида”ги қонун (ЎРҚ–1159-сон) қабул қилинди. Қонуннинг асосий мақсади ижтимоий иш соҳасидаги муносабатларни ҳуқуқий жиҳатдан тартибга солишдан иборат. Бу ҳақда "Ҳуқуқий ахборот" Теlegram-канали хабар берди.
Ҳужжатга кўра, ижтимоий иш — ижтимоий ҳимояга муҳтож шахсларнинг имконият ва салоҳиятини оширишга кўмаклашадиган, ижтимоий хизматлар ва ижтимоий ёрдамни ривожлантириш орқали жамиятда ижтимоий ўзгаришларга хизмат қиладиган касбий фаолият ҳисобланади.
Қонунда ижтимоий иш тиббиёт, таълим, ижтимоий ҳимоя, бандлик, суд ва ҳуқуқни муҳофаза қилувчи органлар ҳамда жазони ижро этиш тизимида ташкил этилиши белгиланган.
Шунингдек, Ижтимоий ҳимоя миллий агентлиги мазкур соҳадаги махсус ваколатли давлат органи этиб белгиланди.
Қонунга мувофиқ, ижтимоий хизматлар ва ижтимоий ёрдам бирламчи, ихтисослашган ҳамда юқори ихтисослашган даражаларга ажратилади. Улар фуқаронинг яшаш жойида, маҳалласида, хизмат кўрсатувчи муассасаларда, жумладан, стационар муассасаларда ҳамда интернет орқали кўрсатилиши мумкин.
Ижтимоий хизматлар ва ёрдам кўрсатиш учун ижтимоий ҳимояга муҳтож шахс ёки унинг қонуний вакилининг мурожаати ҳамда хизматларни олишга розилиги асос бўлади.
Бундан ташқари, Ижтимоий ҳимоя миллий агентлиги ҳузуридаги Ижтимоий инспекция аҳолини ижтимоий ҳимоя қилиш ва ижтимоий хизматлар кўрсатишда қонунчилик талабларига риоя этилиши устидан назоратни амалга оширувчи ваколатли орган этиб белгиланди.
