Франция ва Испаниядаги йирик ўрмон ёнғинлари сабаб 87 минг киши эвакуация қилинди

Франциянинг жануби-ғарбий қисми ва Испаниянинг марказий ҳудудларида давом этаётган йирик ўрмон ёнғинлари оқибатида тахминан 87 минг киши эвакуация қилинди. Табиий офат сабаб ўнлаб ўт ўчирувчилар ҳам жароҳат олди. Бу ҳақда AP хабар берди.

 

Франциянинг Атлантика соҳилидаги Кап-Ферре яриморолида чоршанбадан буён давом этаётган ёнғин 125 квадрат километр ҳудудни қамраб олди. Алангалар сайёҳлик ҳудудларига яқинлашгани сабабли аҳоли ва дам олувчилар автомобиль ҳамда қайиқ орқали хавфсиз жойларга кўчирилди.

 

Францияда яна бир ёнғин ўчоғи юзага келгани ортидан эвакуация ҳудуди кенгайтирилди. Натижада Жиронда департаментида 44 минг, Ланд департаментида эса 23 минг киши эвакуация қилинди.

 

Ёнғин оқибатида 53 та уй ва битта кемпинг ёниб кетган, 42 нафар ўт ўчирувчи жароҳат олган.

 

Ёнғинни ўчириш ишларига юзлаб ўт ўчирувчилар, авиация ва махсус техникалар жалб этилган. Франция президенти Эммануэл Макрон мамлакатга Европа Иттифоқи давлатларидан ёнғинга қарши самолёт ва вертолётлар юборилишини маълум қилди.

 

Испанияда эса ҳукумат тарихда илк бор ўрмон ёнғинлари сабаб миллий фавқулодда ҳолат эълон қилди. Мадрид ва Авила провинцияларидаги ёнғинлар туфайли қарийб 20 минг киши эвакуация қилинди. Мадриднинг ғарбий қисмидаги иккита ёнғин ўчоғи бирлашиб, минтақа тарихидаги энг йирик ёнғинга айлангани қайд этилди.

 

Шунингдек, Авила провинциясидаги ёнғин 90 квадрат километр майдонни қамраб олиб, яна 1,5 минг кишининг эвакуация қилинишига сабаб бўлди. Мамлакатнинг Гвадалахара провинциясида эса тарихдаги иккинчи энг йирик ўрмон ёнғинини ўчириш ишлари давом этмоқда.

 

Мутахассисларнинг таъкидлашича, Европадаги жазирама, қурғоқчилик ва кучли шамоллар ёнғинларнинг тез тарқалишига сабаб бўлмоқда. Олимлар эса иқлим ўзгариши минтақада бундай табиий офатларнинг кўлами ва такрорланиш тезлигини ошираётганидан огоҳлантирмоқда.