Ҳиндистондаги “Сувараклар” ҳаракати таълим вазири истеъфога чиққач, норозилик намойишларини тўхтатди

Ҳиндистонда бир неча ҳафтадан буён давом этаётган оммавий норозилик намойишлари таълим вазири Дҳармендра Прадҳаннинг истеъфосидан сўнг якунланди. Бу ҳақда "Сувараклар" ҳаракатига таяниб, AP хабар берди.

 

Pradhan X ижтимоий тармоғида истеъфога чиққанини эълон қилди. Унинг истеъфоси мамлакат бўйлаб намойишлар, ўтириш акциялари ва очлик эълон қилиш тадбирларини уюштирган ёшлар ҳаракати учун муҳим ғалаба сифатида баҳоланмоқда.

 

Норозиликлар бир ойдан ортиқ вақт аввал Ҳиндистондаги йирик кириш имтиҳонларида саволлар сизиб чиққани ҳақидаги айбловлардан кейин бошланган эди. Дастлаб таълим тизимини ислоҳ қилиш талаби билан бошланган ҳаракат кейинчалик ишсизлик, ҳукуматнинг жавобгарлиги ва иқтисодий имкониятлар масалаларини ҳам қамраб олди.

 

Ҳаракат ташкилотчиларининг билдиришича, ҳукумат таълим тизимини ислоҳ қилиш, имтиҳон саволларининг сизиб чиқиши ортидан ўз жонига қасд қилган талабалар оилаларига компенсация тўлаш ҳамда намойишларда қатнашганларга нисбатан ҳуқуқий чоралар кўрмаслик ҳақидаги талабларни қабул қилган. Шундан сўнг улар намойишларни тўхтатишга чақирди.

 

Прадҳаннинг истеъфоси ҳақидаги хабар Ню-Деҳлида бир ойдан ортиқ вақт давомида намойиш ўтказган минглаб иштирокчилар томонидан тантаналар билан кутиб олинди.

 

Мазкур норозиликлар Бош вазир Нарендра Моди ҳукумати сўнгги йилларда дуч келган энг йирик жамоатчилик босимларидан бири бўлди. Аввалроқ ҳукумат имтиҳон саволларининг сизиб чиқиши билан боғлиқ ишларни тезкор кўриб чиқиш ва имтиҳон тизимидаги фирибгарлик ҳамда коррупцияга қарши чораларни кучайтиришни ваъда қилган эди. Бироқ намойишчилар бу чораларни етарли эмас деб ҳисоблаган.

 

Мухолифат вакиллари эса таълим вазирининг истеъфосини ҳукуматнинг жамоатчилик босими қаршисида ён бергани сифатида баҳолади. Парламентдаги мухолифат етакчиси Раҳул Ганди буни Ҳиндистон таълим тизимини тубдан ислоҳ қилиш йўлидаги муҳим қадам деб атади.