Сурияда иккита автобус тўқнашди, 35 киши ҳалок бўлди
Дайр аз-Зор–Дамашқ автомобиль йўлида содир бўлган ЙТҲда яна 30 киши турли даражадаги тан жароҳати олди.
Суриянинг Дайр аз-Зор–Дамашқ автомагистралида 25 июль куни содир бўлган йирик йўл-транспорт ҳодисаси оқибатида 35 киши ҳалок бўлди, 30 киши жароҳатланди.
SANA агентлиги хабарига кўра, авария Ас-Сухна ва Палмира шаҳарлари оралиғида икки автобуснинг тўқнашуви натижасида юз берган.
Ҳодисадан сўнг Сурия Мудофаа вазирлиги жабрланганлар ва ҳалок бўлганларни Ҳомс ҳарбий шифохонасига етказиш учун тиббий эвакуацияга бир нечта вертолётни жалб қилди.
Ички ишлар вазирлиги тез ёрдам бригадалари ва тегишли хизматлар зудлик билан воқеа жойига етиб борганини, жабрланганларни шифохоналарга олиб бориш ҳамда ҳалок бўлганларни эвакуация қилиш ишлари давом этаётганини маълум қилди.
Соғлиқни сақлаш вазирлиги Тез тиббий ёрдам ва шошилинч тиббий хизматлар бошқармаси директори Нажиб ал-Наасаннинг билдиришича, айни пайтда авария оқибатида 35 киши ҳалок бўлган, 30 киши эса жароҳатланган.
Шунингдек, Сурия Фуқаро мудофааси хизмати Палмирадаги қутқарув гуруҳларини ҳодиса жойига юборган, Дайр аз-Зордаги бўлинмалардан эса қўшимча кучлар жалб қилинган.
