Тўқаев Путинни Украинадаги урушни "музлатиш"га чақирди
Қозоғистон президенти Омскдаги музокараларда можарони "Истанбул формуласи 2.0" асосида ҳал этишни таклиф қилиб, тинчликка буюк давлатлар кафолати остида эришиш мумкинлигини билдирди.
Қозоғистон президенти Қосим-Жўмарт Тўқаев Омск шаҳрида Россия президенти Владимир Путин билан ўтказилган музокараларда Россия-Украина урушини "музлатиш" ва тинчлик музокараларини қайта бошлаш зарурлигини таъкидлади.
Тўқаевнинг айтишича, унга АҚШ ва Европа давлатларидан Россия ҳамда Украина ўртасидаги можаро юзасидан кўплаб мурожаатлар келиб тушмоқда ва у бу ҳақда Путинни хабардор қилган.
Қозоғистон президенти можаронинг келиб чиқишини кўпчилик, жумладан Қозоғистон учун ҳам тушуниш қийинлигини айтиб, уни Озарбайжон ва Арманистон ўртасидаги тарихий можаро билан таққослади.
Шунингдек, Тўқаев Путиннинг Аляскада АҚШ билан ўтказилган музокараларда "максимал дипломатик мослашувчанлик" намоён этганини таъкидлади.
Унинг фикрича, можарони "музлатиш" ва аввал муҳим натижаларга эришилган "Истанбул формуласи 2.0"га қайтиш, шунингдек, Россия ҳам иштирок этадиган йирик давлатлар кафолати остида тинчлик сари ҳаракат қилиш мақсадга мувофиқ.
Тўқаев уруш оқибатида ёшларнинг ҳалок бўлаётганини афсус билан қайд этиб, "Буларнинг барчасини тўхтатиш керак", деди. Унинг таъкидлашича, давом этаётган уруш Россия ва Украина рақиблари манфаатларига хизмат қилмоқда. Путин эса учрашув давомида Тўқаевни "Украина йўналиши"даги вазият ҳақида батафсил хабардор қилишини маълум қилди.
Аввалроқ Reuters агентлиги Кремлга яқин манбаларга таяниб, Владимир Путин Украина билан тинчлик музокаралари бўйича таклифларни рад этаётгани ва Донецк вилоятининг қолган қисмини эгаллаш масаласида муросасиз позицияни сақлаб қолаётгани ҳақида хабар берганди.
