Исроил АҚШ ёрдамисиз омон қололмайди — Трамп
Америка президенти, аввало, Эрон атрофидаги вазиятни назарда тутганини таъкидлади.
АҚШ президенти Доналд Трамп Исроилнинг хавфсизлиги Америка Қўшма Штатлари ёрдами билан чамбарчас боғлиқ эканини таъкидлади.
Вашингтондан Мичиган штатига йўл олган самолётда журналистлар билан мулоқот қилган Трамп:
“Биласизми, бизсиз ким омон қолмайди? Исроил,” — деди.
Унинг сўзларига кўра, бу фикр, аввало, Эрон атрофидаги вазият билан боғлиқ.
“Агар мен бу масалани ҳал қилмаганимда, яқинда ядровий қуролга айланиши мумкин бўлган объектларни йўқ қилмаганимда, Исроил бир неча ой олдин йўқ бўлиб кетган бўларди. Йиллар олдин эса Обаманинг даҳшатли ядровий келишувига чек қўймаганимда ҳам шундай бўларди,” — деди АҚШ президенти.
Трамп шу орқали Пентагон томонидан 2025 йил июнь ойида Исфаҳон, Натанз ва Фордодаги Эрон ядровий объектларига берилган зарбаларни ҳамда АҚШнинг 2018 йилда 2015 йилда имзоланган Қўшма кенг қамровли ҳаракатлар режасидан (JCPOA) чиқиш қарорини назарда тутганини билдирди.
