Сув хўжалигида соғлом ва замонавий бошқарув тизими жорий этилмоқда
Янги тизим доирасида сув инфратузилмаси лойиҳалари ягона электрон платформага ўтказилади.
Ичимлик суви соҳасини самарали бошқариш ва замонавий тизимга айлантириш мақсадида бир қатор янги механизмлар жорий этилади.
2026 йил сентябрь ойидан бошлаб барча сув инфратузилмаси лойиҳалари ягона электрон платформада акс эттирилади. Шунингдек, ер ости сувлари ҳолати бўйича маълумотлар ҳам ушбу тизимга интеграция қилинади.
Бундан ташқари, автомобиль йўлларини қуриш ва таъмирлаш жараёнида йўл остидаги сув коммуникацияларини реконструкция қилиш ишлари олдиндан лойиҳа ҳужжатларига киритилади. Бу эса кейинчалик йўлларни қайта қазиш билан боғлиқ муаммоларни камайтиришга хизмат қилади.
“Ўзсувтаъминот” АЖда рақамлаштириш ва сунъий интеллект технологияларини жорий этиш бўйича бошқарув раиси ўринбосари лавозими ташкил этилади.
Шунингдек, 2027 йилдан бошлаб тарифларни тасдиқлаш ваколати Идоралараро тариф комиссиясига ўтказилади. Бюджет ташкилотлари учун ягона тарифлар жорий этилиши ҳамда соҳага хусусий сектор инвестицияларини жалб қилиш режалаштирилмоқда.
Мутасаддиларга кўра, мазкур чора-тадбирлар бюджет маблағларидан самарасиз фойдаланишнинг олдини олиш, коррупсион хавфларни камайтириш ва сув таъминоти тизимида очиқликни таъминлашга хизмат қилади.
