АҚШ Хитойда ишлаб чиқарилган янги роботлар импортини тақиқлади

АҚШ Федерал алоқа комиссияси (FCC) Хитойда ишлаб чиқарилган янги гуманоид роботлар, робот-итлар ва қувват инверторларини миллий хавфсизлик нуқтаи назаридан тақиқланган ускуналар рўйхатига киритди. Бу ҳақда Al Jazeera хабар берди.

 

Қарор дарҳол кучга кирган бўлса-да, у фақат АҚШда ҳали сотувга рухсат берилмаган янги моделларни қамраб олади.

 

Комиссия ушбу қурилмалар таъминот занжири ва киберхавфсизлик учун хавф туғдириши, шунингдек, хорижий томонлар уларни назорат остига олса, АҚШ иқтисодиёти ҳамда муҳим инфратузилмаларига зарар етказиши мумкинлигини таъкидлади.

 

Мазкур қарор АҚШнинг сунъий интеллект, энергетика ва маълумотлар марказлари каби стратегик соҳаларда Хитой технологияларига қарамликни камайтиришга қаратилган сиёсатининг бир қисми ҳисобланади.

 

Чекловлар АҚШнинг Nvidia технологиялари асосида роботлар ишлаб чиқишда ҳамкорлик қилган Хитойнинг Unitree компаниясига ҳам таъсир кўрсатиши кутилмоқда. Яқинда Пентагон компанияни Хитой ҳарбий тузилмалари билан алоқадорликда гумон қилинаётган корхоналар рўйхатига киритган, Пекин эса бу айбловларни рад этган.

 

Хитойнинг Вашингтондаги элчихонаси АҚШ қарорини танқид қилиб, Вашингтонни Хитой компанияларига нисбатан босимни тўхтатишга чақирди. Дипломатик ваколатхона Пекин ўз манфаатларига зарар етказадиган ҳар қандай ҳаракатга жавобан зарур чораларни кўришини маълум қилди.

 

Чекловлар Хитойнинг Huawei ва Sungrow каби қувват инверторлари ишлаб чиқарувчиларига ҳам тааллуқли бўлиши мумкин. Бироқ АҚШда аввалроқ сотувга рухсат берилган маҳсулотлар янги тартибдан мустасно ҳисобланади, гарчи FCC айрим ҳолларда бундай рухсатномаларни бекор қилиш ҳуқуқини сақлаб қолган бўлса ҳам.

 

Қарор Доналд Трамп маъмурияти АҚШда илғор ишлаб чиқаришни кенгайтиришга интилаётган бир пайтда қабул қилинди. Ҳозирда Tesla, Figure AI, Agility Robotics ва Boston Dynamics мамлакатда гуманоид роботларни ишлаб чиқиш ёки йиғиш билан шуғулланмоқда.

 

Қайд этилишича, мазкур чекловлар АҚШ ва Хитой ўртасидаги сунъий интеллект, илғор микрочиплар, савдо ҳамда стратегик технологиялар бўйича мавжуд қарама-қаршиликларни янада кучайтириши мумкин.