Россияда Ўзбекистон фуқароси террорчилар билан алоқани яширгани учун ҳибсга олинди
Эркак халқаро қидирувдаги террорчилик ташкилоти аъзоси билан олти ой давомида мунтазам мулоқот қилган.
Россиянинг Санкт-Петербург шаҳрида Ўзбекистон фуқароси террорчилик ташкилоти вакилининг ёллашга уринишлари ҳақида ҳуқуқни муҳофаза қилувчи органларга хабар бермагани учун қўлга олинди. Бу ҳақда ТАСС ҳуқуқ-тартибот идораларидаги манбаларига таяниб хабар берди.
Маълум қилинишича, 1999 йилда туғилган Ўзбекистон фуқароси ўтган йил кузида Телеграм орқали Россияда тақиқланган "Ислом давлати" (ИШИД) террорчилик ташкилотининг халқаро қидирувда бўлган аъзоларидан бири билан алоқага киришган. Манбага кўра, улар ўртасидаги ёзишмалар қарийб олти ой давом этган.
Тергов маълумотларига кўра, суҳбат давомида террорчилик ташкилоти вакили эркакни ИШИД сафига қўшилишга, Сурияга бориб жанговар ҳаракатларда қатнашишга ҳамда террорчилик фаолиятини молиявий қўллаб-қувватлаш учун пул ўтказишга ундаган.
Ҳуқуқни муҳофаза қилувчи органларга ушбу ёллашга уринишлар ҳақида хабар бермагани сабабли унга нисбатан Россия Жиноят кодексининг 205.6-moddasi ("Жиноят ҳақида хабар бермаслик") билан жиноят иши қўзғатилган. Мазкур модда бўйича бир йилгача озодликдан маҳрум қилиш жазоси назарда тутилган.
Айни пайтда тергов ҳаракатлари давом этмоқда. Агар террорчилик ташкилотига пул ўтказилгани тасдиқланса, гумонланувчига террорчилик фаолиятига кўмаклашиш айблови ҳам қўйилиши мумкин. Россия қонунчилигига кўра, бундай жиноят учун 15 йилгача озодликдан маҳрум қилиш жазоси белгиланган.
