Япониядаги зилзила қурбонлари сони 13 нафарга етди
Зилзила оқибатларини бартараф этиш ва қидирув-қутқарув ишларига 4,6 мингга яқин ҳарбий хизматчиси жалб этилган.
Япониянинг Кюшу оролида содир бўлган 7,1 магнитудали зилзила оқибатида ҳалок бўлганлар сони 13 нафарга етди. Бу ҳақда BBС хабар берди.
Япония бош вазири Санаэ Такаичининг маълум қилишича, зилзила оқибатида қулаган бинолар, ёнғинлар ва инфратузилмага жиддий зарар етган. Ҳозирда ёрдам кутаётган фуқароларни қутқариш ишлари барча тегишли хизматлар томонидан давом эттирилмоқда.
«13 кишининг вафот этгани тасдиқланди. Бундан ташқари, кўплаб одамлар жароҳат олган. Айрим ҳудудларда одамлар ҳануз ёрдам кутмоқда. Имкон қадар кўпроқ инсон ҳаётини сақлаб қолиш учун барча ресурсларимиз сафарбар этилган», — деди бош вазир.
Расмий маълумотларга кўра, 7 киши оғир, 29 киши енгил тан жароҳати олган. 9 мингдан ортиқ фуқаро вақтинчалик эвакуация марказларига жойлаштирилган.
Шунингдек, табиий офат оқибатида 36,9 мингга яқин хонадон электр энергиясисиз, 84 мингга яқин уй ва хонадон ичимлик сувисиз, 9,5 минг истеъмолчи эса газ таъминотисиз қолган. Айрим ҳудудларда алоқа тизимларида ҳам узилишлар кузатилмоқда.
Зилзила оқибатларини бартараф этиш ва қидирув-қутқарув ишларига Япония Ўзини ўзи ҳимоя қилиш кучларининг 4,6 мингга яқин ҳарбий хизматчиси жалб этилган.
Мутахассисларнинг қайд этишича, 7,1 магнитудали зилзила сўнгги йилларда Японияда кузатилган энг кучли табиий офатлардан бири бўлди. Ҳозирда қидирув-қутқарув ишлари давом этмоқда.
