“Энди бизнинг навбатимиз” — АҚШ Эронга яна зарба берди
Вашингтон янги ҳужумларни Эроннинг Яқин Шарқдаги АҚШ кучларига қарши ҳаракатларига жавоб деб атади.
АҚШ Эронга қарши ҳарбий зарбаларни қайта бошлаганини маълум қилди. Вашингтон янги ҳужумларни Эроннинг Яқин Шарқдаги АҚШ кучларига қарши ҳаракатларига жавоб сифатида изоҳлади.
АҚШ Марказий қўмондонлиги CENTCOM) маълумотига кўра, ҳарбий амалиёт давомида Ислом инқилоби қўриқчилари корпуси (IRGC)га тегишли қўмондонлик марказлари, ракета ва дрон учириш майдончалари ҳамда қирғоқ қўриқлаш инфратузилмасига зарбалар берилган.
CENTCOM баёнотида операция АҚШ ҳарбийлари ва минтақадаги иттифоқчилар хавфсизлигини таъминлаш мақсадида амалга оширилгани қайд этилди.
Реутерс агентлиги Эрон оммавий ахборот воситаларига таяниб хабар беришича, мамлакат жанубидаги бир қатор ҳудудларда, жумладан Аҳваз шаҳри, Қешм ороли ва Бушеҳр атрофида портлашлар кузатилган.
АҚШ Президенти Доналд Трамп аввалроқ Эроннинг Иорданиядаги АҚШ ҳарбий базасига уюштирилган ҳужумидан сўнг Вашингтон “жуда кучли жавоб” беришини билдирган эди. Унинг таъкидлашича, АҚШ ҳаракатлари Теҳроннинг сўнгги ҳужумларига жавоб ҳисобланади.
Шунингдек, АҚШ ва Саудия Арабистони Ироқ ҳудудидаги Эрон томонидан қўллаб-қувватланаётган қуролли гуруҳлар объектларига ҳам зарбалар берганини маълум қилди. Ироқ расмийлари эса мамлакат ҳудудига берилган ҳужумларни қоралаб, буни давлат суверенитетининг бузилиши сифатида баҳолаган.
Сўнгги ҳарбий ҳаракатлар фонида Яқин Шарқдаги вазият кескинлигича қолмоқда. Шу билан бирга, айрим халқаро нашрлар томонлар ўртасида дипломатик мулоқотни тиклаш эҳтимоли ҳам муҳокама қилинаётганини хабар бермоқда.
