Ўзбекистон–Қирғизистон чегарасидаги назорат-ўтказиш пунктлари сони икки баробарга оширилади

Қирғизистон Президенти Садир Жапаров Иссиқкўлдаги “Руҳ-Ордо” маданият марказида Ўзбекистон Президенти Шавкат Мирзиёев билан ўтказилган музокаралар якунида Ўзбекистон–Қирғизистон давлат чегарасидаги назорат-ўтказиш пунктлари сонини 15 тадан 30 тага ошириш бўйича ҳужжатлар имзоланганини маълум қилди. Бу ҳақда 24 кг хабар берди.

 

Жапаровнинг таъкидлашича, мазкур қарор икки мамлакат фуқароларининг ўзаро қатновини енгиллаштиради ҳамда савдо-иқтисодий ва гуманитар алоқаларни кенгайтиришга хизмат қилади.

 

“Энди одамлар бир-бириникига эркин бориб келиши, бизнес билан шуғулланиши, таълим олиши ва дам олиши мумкин”, — деди Қирғизистон раҳбари.

 

У, шунингдек, Қирғизистон ва Ўзбекистон ўртасидаги муносабатлар бугунги кунда ўз тарихидаги энг юксак босқичлардан бирига чиққанини қайд этди.

 

Шавкат Мирзиёевнинг давлат ташрифи доирасида икки мамлакат ўртасида давлат чегарасининг бир участкаси тўғрисидаги шартнома, назорат-ўтказиш пунктларига оид баённома, турли соҳалардаги ҳамкорлик битимлари ҳамда Иттифоқчилик муносабатлари тўғрисидаги шартнома имзоланди.

 

Иссиқкўлда Марказий Осиё давлатлари ва Озарбайжон раҳбарларининг Маслаҳат учрашуви бўлиб ўтмоқда. Унда минтақа давлатлари етакчилари ва Озарбайжон Президенти Илҳом Алиев иштирок этмоқда.