Андижонда 39 минг доллар эвазига ер олиб беришни ваъда қилган шахслар ушланди
Улар давлат захирасидаги 24 сотих ер майдонини мансабдор танишлари орқали фуқаро номига расмийлаштириб беришни ваъда қилган.
Андижон вилоятида давлат захирасидаги ер майдонини ноқонуний расмийлаштириш билан боғлиқ коррупцион ҳолат фош этилди. Бу ҳақда ДХХ хабар берди.
Маълум қилинишича, Андижон вилояти Марҳамат туманида фаолият юритувчи банк хизматлари марказларидан бирининг бошлиғи ҳамда «Норин–Қорадарё» ирригация тизимлари ҳавза бошқармаси машинисти ўзаро тил бириктириб, 1989 йилда туғилган фуқаронинг ишончига кирган.
Улар Марҳамат тумани ҳокимлиги захирасидаги 24 сотих ер майдони гўёки турар жой тоифасига ўтказилгани ва унга оид ҳужжатлар мавжудлигини айтиб, мансабдор танишлари орқали ушбу ер участкасини фуқаро номига расмийлаштириб беришни ваъда қилган. Бунинг эвазига эса 39 минг АҚШ доллари талаб қилган.
Давлат хавфсизлик хизмати, Иқтисодий жиноятларга қарши курашиш департаменти ҳамда Ички ишлар органлари ходимлари ҳамкорлигида ўтказилган тезкор тадбир давомида бошқарма машинисти олдиндан 25 минг АҚШ долларини олаётган вақтида ашёвий далиллар билан қўлга олинди.
Мазкур ҳолат юзасидан гумонланувчиларга нисбатан жиноят иши қўзғатилиб, тергов ҳаракатлари олиб борилмоқда.
