Ўзбекистонда жазирамага қарамасдан, ёзги туризмга қизиқиш ортмоқда

Ёзнинг жазирама кунларида ҳам Ўзбекистон бўйлаб саёҳатлар оммабоплигини йўқотгани йўқ. Бунга сўнгги йилларда бассейнли меҳмонхоналар, аквапарклар, тоғ курортлари ва сув ҳавзалари бўйидаги замонавий дам олиш масканлари сонининг кўпайгани сабаб бўлмоқда.

 

 

Туризм қўмитаси маълумотларига кўра, фақат июнь ойининг ўзида мамлакатга 1,2 миллиондан ортиқ хорижий сайёҳ келган. Бу Ўзбекистон ёз мавсумида ҳам саёҳатчилар учун жозибадор йўналиш бўлиб қолаётганини кўрсатади.

 

 

Ёзги дам олиш инфратузилмаси энг ривожланган ҳудудлардан бири Тошкент вилояти бўлиб, Чорвоқ ва Бўстонлиқдаги тоғ курортлари, бассейнли меҳмонхоналар ҳамда аквапарклар минглаб меҳмонларни қабул қилмоқда.

 

 

Самарқанд, Бухоро ва Хива шаҳарларида тарихий обидалар билан бир қаторда замонавий меҳмонхоналар, бассейн ва СПА хизматлари сайёҳларга таклиф этилмоқда. Бухоро вилоятидаги Тўдакўл сув омбори эса пляж, қайиқ сайрлари ва сув спорти турлари билан ички туризмнинг оммабоп масканларидан бирига айланган.

 

 

Водий вилоятларида ҳам ёзги туризм инфратузилмаси кенгаймоқда. Намангандаги "Афсоналар водийси" мажмуасида йирик аквапарк ва 16 та бассейн фаолият юритаётган бўлса, Андижон ва Фарғонада замонавий аквапарклар ҳамда бассейнли меҳмонхоналар сайёҳларга хизмат кўрсатмоқда.

 

 

Жиззах вилоятидаги Зомин тоғ курортлари ва Айдаркўл бўйидаги дам олиш масканлари, шунингдек Навоийдаги Айдаркўл кўллар тизими экотуризмнинг энг машҳур йўналишлари сифатида ривожланмоқда. Бу ҳудудларда кўл бўйида дам олиш, қайиқ сайрлари, чўл сафари ва ўтовларда тунаш каби хизматлар йўлга қўйилган.

 

 

Қашқадарё, Сурхондарё, Сирдарё ҳамда Қорақалпоғистонда ҳам бассейнли меҳмонхоналар ва сув-кўнгилочар мажмуалар сони ортиб бормоқда. Нукусдан Орол денгизи ва Устюрт платосига саёҳат қилувчи сайёҳлар учун ҳам замонавий меҳмонхоналар хизмат кўрсатмоқда.

 

 

Қайд этилишича, бугунги кунда Ўзбекистонда ёзги туризм нафақат тарихий обидаларни зиёрат қилиш, балки тоғ курортлари, бассейнлар, СПА марказлари ва сув аттракционларида дам олиш имкониятлари билан ҳам бойиб бормоқда. Натижада жазирама об-ҳаво мамлакат бўйлаб саёҳат қилишга бўлган қизиқишни камайтираётгани йўқ.