АҚШ Қешм оролидаги уйга 900 килограммлик авиабомба ташлаган — NYT
Нашр таҳлилига кўра, ҳужум оқибатида бир оила аъзолари ҳалок бўлган, зарба берилган ҳудуд яқинида эса ҳарбий объектлар аниқланмаган.
АҚШнинг Эроннинг Қешм оролига берган зарбаси аҳоли зич яшайдиган ҳудуддаги турар жойни нишонга олган бўлиши мумкин. Бу ҳақда The Times of India нашри The New York Times нашрига таяниб хабар берди.
Нашр видео, фото ва сунъий йўлдош тасвирлари таҳлилига таяниб, ҳужум оқибатида эр-хотин ва уларнинг икки ёшли фарзанди ҳалок бўлганини ёзди. Оиланинг яна икки нафар фарзанди вайроналар остидан тирик қутқарилган ва шифохонада даволанмоқда.
Қурол-яроғ бўйича экспертлар баҳолашича, зарбада АҚШ арсеналидаги энг йирик оддий авиабомбалардан бири — JDАМ бошқарув тўплами билан жиҳозланган 2 минг фунт (тахминан 900 килограмм) оғирликдаги Марк 84 бомбаси қўлланган бўлиши мумкин.
Суриштирувда қайд этилишича, портлаш оқибатида камида тўққиз метр диаметрли ўра ҳосил бўлган, бомба парчалари ва шикастланган автомобиллар 60 метрдан ортиқ масофага сочилиб кетган. Ҳужум натижасида қарийб 20 оила бошпанасиз қолган.
The New York Times журналистлари вайрон бўлган уй атрофида ҳарбий объектлар ёки зарба ҳарбий нишонга қаратилганини тасдиқловчи далилларни аниқламаганини маълум қилди.
АҚШ Марказий қўмондонлиги (CЕNTCОМ) эса тинч аҳоли орасидаги эҳтимолий қурбонлар ҳақидаги маълумотларни ўрганаётганини билдирган. Бироқ қўмондонлик зарбанинг асл нишони нима бўлгани ва нима сабабдан айнан бундай юқори қувватли бомба қўлланганига изоҳ бермаган.
