Қримда электр узилишлари ортидан аҳоли иссиқ овқат учун навбатга турмоқда
Массандра шаҳрида электрсиз қолган аҳолига ҳар куни юзлаб порция иссиқ овқат тарқатилмоқда.
Россия томонидан аннексия қилинган Қрим яриморолида электр таъминотидаги узилишлар сабаб аҳоли иссиқ овқат олиш учун кўчаларда ташкил этилган тарқатиш пунктларига мурожаат қилмоқда. Бу ҳақда Reuters хабар берди.
Қримнинг Массандра шаҳрида маҳаллий ҳокимият электр энергияси узилгани туфайли уйида овқат тайёрлай олмаётган фуқаролар учун дала ошхонасини ташкил қилган. Шаҳар маъмурияти раҳбари Оксана Мадюднинг айтишича, бу ерда ҳар куни қарийб 200 кишига гречка ва консерваланган гўштдан тайёрланган иссиқ таом тарқатилмоқда.
Маҳаллий аҳоли вакилларининг сўзларига кўра, электр таъминотидаги узилишлар уларни газ плиталари ва баллонлар излашга мажбур қилган. Айрим ҳудудларда электр энергияси 10 кунгача узилиб қолган.
Россия 2014 йилда аннексия қилган Қрим ёз давомида Украина томонидан электр станциялари ва бошқа муҳим инфратузилма объектларига уюштирилган зарбалар оқибатида ёқилғи ва электр таъминоти билан боғлиқ муаммоларга дуч келмоқда.
Украина эса Россия ҳудуди ва Москва назоратидаги ҳудудларга узоқ масофали зарбаларни кучайтираётганини билдириб, буни мамлакатига қарши олиб борилаётган урушга жавоб чораси сифатида изоҳламоқда.
