Индонезияда 250 киши бўлган йўловчи пароми ёниб кетди
Ҳодиса оқибатида камида беш киши ҳалок бўлган, 41 киши бедарак йўқолган. Ҳозирда қидирув-қутқарув ишлари давом этмоқда.
Индонезияда бортида камида 250 киши бўлган йўловчи паромида ёнғин чиқиши оқибатида беш киши ҳалок бўлди, яна 41 киши бедарак йўқолган. Бу ҳақда мамлакат Миллий қидирув ва қутқарув агентлигига (Басарнас) таяниб, BBC хабар берди.
Маълумотларга кўра, КМП Mutiara Sentosa 2 пароми Шарқий Ява провинциясидаги Сурабая шаҳридан Жанубий Сулавесидаги Макассар шаҳрига йўл олган пайтда Мадура ороли яқинида ёниб кетган. Паром капитани ёнғин ҳақида фавқулодда хизматларга денгизда бўлган вақтида хабар берган.
Басарнаснинг билдиришича, ёнғин маҳаллий вақт билан тахминан соат 06:00–07:00 оралиғида бошланган. Қутқарувчилар воқеа жойига етиб боргунига қадар кема деярли тўлиқ аланга ичида қолган. Йўловчилар эса қутқарувни кутиб, кеманинг бошқарув қисми ва олд қисмида жон сақлаб турган.
Маҳаллий ОАВ тарқатган видеоларда паромнинг юқори қисмидан қуюқ тутун ва аланга кўтарилаётгани, айрим йўловчилар эса қутулиш мақсадида ўзини денгизга ташлагани акс этган. Қутқарув жилетларини кийган одамларга қутқарув ҳалқалари улоқтирилган ва улар қутқарув кемаларига олиб чиқилган.
Ҳозирча ёнғиннинг келиб чиқиш сабаби расман маълум қилинмаган.
Расмийларнинг сўнгги маълумотларига кўра, ҳодиса оқибатида беш киши ҳалок бўлган, 41 киши бедарак йўқолган. Қидирув-қутқарув ишлари давом этмоқда.
