Нью-Йоркда давоси ва вакцинаси мавжуд бўлмаган Бурбон вируси билан боғлиқ илк ҳолат қайд этилди
Олимлар “ёлғиз юлдуз” канаси орқали юқадиган ва махсус давоси мавжуд бўлмаган вирус кутилганидан кенгроқ тарқалган бўлиши мумкинлигидан огоҳлантирди.
АҚШнинг Нью-Йорк штатида кана орқали юқадиган кам учрайдиган Бурбон вируси билан касалланишнинг илк ҳолати тасдиқланди. Бу ҳақда Fox News хабар берди.
Мутахассислар вирусга чалинган бошқа беморлар ҳам бўлиши мумкин, бироқ ташхис қўйиш қийинлиги сабабли улар аниқланмай қолаётганидан огоҳлантирмоқда. Stony Brook Medicine олимлари вирусни Лонг-Айлендда яшовчи беморда аниқлаган. Оғир аҳволда шифохонага ётқизилган беморда ўтказилган лаборатория текширувлари Бурбон вирусини тасдиқлаган.
Мутахассисларга кўра, вирус "ёлғиз юлдуз" канаси орқали юқади. Касалликнинг асосий аломатлари орасида юқори ҳарорат, ҳолсизлик, тошма, бош ва мушак-оғриқлари ҳамда кўнгил айниши бор. Ҳозирча Бурбон вирусига қарши на вакцина, на махсус даволаш усули мавжуд.
Шифокорларнинг таъкидлашича, касаллик белгилари кана орқали юқадиган бошқа инфекцияларга ўхшаш бўлгани, шунингдек, Бурбон вирусини аниқлаш учун кенг қўлланиладиган диагностик тест йўқлиги сабабли кўплаб ҳолатлар эътибордан четда қолиши мумкин.
Бурбон вируси илк бор 2014 йилда АҚШнинг Канзас штатида аниқланган. Ўшандан буён дунё бўйича атиги олти ҳолат расман қайд этилган. Вирус камида икки кишининг ўлими билан боғланган, бироқ олимлар ҳақиқий касалланиш ҳолатлари бундан кўпроқ бўлиши мумкинлигини айтмоқда.
АҚШ Касалликларни назорат қилиш ва олдини олиш маркази (CDC) маълумотларига кўра, Lone Star канаси мамлакатнинг шимоли-шарқий, жанубий ва марказий ҳудудларида кенг тарқалган. Шу боис мутахассислар фуқароларга табиат қўйнида эҳтиёт чораларига амал қилиш, кана чаққанидан кейин иситма ёки бошқа аломатлар кузатилса, шифокорга мурожаат қилишни тавсия этмоқда.
