Тошкентда 1 август — Озарбайжон Алифбоси ва Озарбайжон Тили куни нишонланди
Тадбир давомида Озарбайжон алифбосининг тарихий тараққиёт йўли, тилнинг халқ миллий ўзлиги ва маънавий асраб-авайлашдаги беқиёс ўрни ҳақида батафсил маълумот берилди.
Ўзбекистондаги Ҳайдар Алиев номидаги Озарбайжон Маданият Марказида 1 август — Озарбайжон Алифбоси ва Озарбайжон Тили куни муносабати билан тадбир ўтказилди.
Тадбир давомида Озарбайжон алифбосининг тарихий тараққиёт йўли, она тилининг халқ миллий ўзлиги ва маънавий асраб-авайлашдаги беқиёс ўрни ҳақида батафсил маълумот берилди. Озарбайжон Республикаси Президенти жаноб Илҳом Алиев Озарбайжон тилини муҳофаза қилиш, унинг софлигини таъминлаш ҳамда қўлланиш имкониятларини кенгайтиришга доимо алоҳида эътибор қаратаётгани таъкидланди. Шу муносабат билан давлат раҳбарининг: “Бугунги кунда 50 миллиондан ортиқ инсон учун Озарбайжон тили она тилидир. Соф, мусаффо ва адабий Озарбайжон тилининг ҳимоячиси биз — мустақил Озарбайжон давлатимиз”, — деган сўзлари алоҳида қайд этилди. Президент Илҳом Алиев раҳбарлигида Озарбайжон тилини ривожлантириш, унинг қўлланиш доирасини кенгайтириш ва халқаро миқёсда тарғиб этиш йўналишида изчил ҳамда мақсадли чора-тадбирлар амалга оширилаётгани билдирилди.
Озарбайжон Маданият Марказида фаолият юритаётган Озарбайжон тили курслари тингловчилари тилнинг бойлиги, миллий асраб-авайлашдаги ўрни ҳамда она тилига садоқатнинг аҳамияти ҳақида ўз фикр-мулоҳазаларини билдирдилар. Дастур доирасида 1 август — Озарбайжон Алифбоси ва Озарбайжон Тили кунига бағишланган видеолавҳа иштирокчилар эътиборига ҳавола этилди.
Тадбир якунида Марказ фаолиятига янги жалб этилган ёшлар учун таништирув экскурсияси ташкил қилинди. Иштирокчилар Марказда фаолият юритаётган музейлар ва кутубхона билан танишиб, экспозициялар, экспонатлар ҳамда кутубхона фонди ҳақида батафсил маълумот олдилар.
