2027 йилдан ногиронлиги бўлган болалар ваучер асосида ассистив жиҳозлар билан таъминланади
Ногиронлиги бўлган болаларнинг уйига яқин жойда махсус синфлар ташкил этган нодавлат мактабларга ҳар бир ўқувчи учун субсидия ажратилади.
Президент Шавкат Мирзиёев алоҳида таълим эҳтиёжлари бўлган болаларни таълим ва ижтимоий хизматлар билан қамраб олиш, шунингдек, ногиронлиги бўлган шахслар учун таълим имкониятларини кенгайтиришга қаратилган таклифлар тақдимоти билан танишди.
Тақдимотда қайд этилишича, бугунги кунда Ўзбекистонда ногиронлиги бўлган 168 мингдан ортиқ бола истиқомат қилади. Уларнинг 133,8 минг нафари таълим ва ижтимоий хизматлар билан қамраб олинган бўлса, яна 34,6 минг нафар болани таълимга жалб этиш зарур.
Шу мақсадда 2026 йил 1 октябрдан Хоразм ва Навоий вилоятларида алоҳида таълим эҳтиёжлари бўлган болаларнинг эҳтиёжларини баҳолашнинг янги механизми синов тариқасида жорий этилади. Унда ижтимоий ходимлар ҳар бир бола билан "оилабай" ишлайди ва унга мос таълим ҳамда ижтимоий хизматлар белгиланади.
2026/2027-ўқув йилидан махсус мактабларда таълим индивидуал режалар асосида ташкил этилиши, кўзи ожиз педагоглар ҳамда бошланғич синфларга шахсий ассистент ва ёрдамчи ходимлар бириктирилиши режалаштирилган.
Шунингдек, ногиронлиги бўлган болаларнинг уйига яқин жойда таълим олишига шароит яратиш мақсадида коррексион синфлар ташкил этган нодавлат мактабларга ҳар бир ўқувчи учун субсидия ажратилади. Ҳар йили камида 50 та мактабнинг инклюзив муҳитни яхшилашга қаратилган ташаббуслари грант асосида молиялаштирилади.
2027 йилдан болаларни матнни ўқиш қурилмалари, овоз синтезаторлари, Брайл дисплейлари ва бошқа ассистив жиҳозлар билан ваучер асосида таъминлаш таклиф этилди.
2027/2028-ўқув йилидан эса ногиронлиги бўлган шахсларга кириш ва сертификат имтиҳонларида қўшимча вақт, Брайл алифбоси, сурдотаржимон, ассистент ва бошқа зарур шароитлар яратилади.
