АҚШдаги ўрмон ёнғинларидан жабрланганлар орасида ўзбекистонликлар йўқ
Ёнғинлар фонида Бош консулхона ватандошларга мурожаат қилди.
Ўзбекистоннинг Сиетлдаги Бош консулхонаси АҚШнинг Вашингтон штатида юз бераётган йирик ўрмон ёнғинлари оқибатида жабрланганлар орасида Ўзбекистон фуқаролари йўқлигини маълум қилди.
Маълум қилинишича, Вашингтон штатининг Спокан шаҳри ва унинг атрофидаги ҳудудларда кузатилаётган ёнғинлар сабаб қарийб 60 минг нафар аҳолини эвакуация қилиш бўйича кўрсатма берилган.
Reuters агентлиги маълумотига кўра, ёнғинлар оқибатида 600 та бино, жумладан турар жойлар ва корхоналар вайрон бўлган. Ҳозирга қадар 250 минг акрдан ортиқ (101 минг гектардан зиёд) ҳудуд ёнғин билан қамраб олинган.
Спокан ёнғин хавфсизлиги хизмати бошлиғи Том Уилямснинг айтишича, ҳудуддаги учта алоҳида ёнғин ўчоғи эвакуация эълон қилинган туманлар учун жиддий хавф туғдирмоқда. Ёнғинни бартараф этиш ишларига Миллий гвардия билан бир қаторда АҚШнинг ўндан ортиқ штатларидан жалб этилган ўт ўчирувчилар ҳам сафарбар этилган.
Ўзбекистоннинг Сиетлдаги Бош консулхонаси ҳозирги кунга қадар ёнғинлардан жабрланган ёки зарар кўрган Ўзбекистон фуқаролари ҳақида маълумот келиб тушмаганини билдирди.
Шунингдек, дипломатик ваколатхона АҚШнинг ёнғин кузатилаётган ҳудудларида истиқомат қилаётган ватандошлардан маҳаллий ҳокимият органлари кўрсатмаларига қатъий амал қилишни, хавфсизлик чораларига риоя этишни ҳамда зарурат туғилганда Бош консулхона билан боғланишни сўради.
