АҚШдан 18 нафар ўзбекистонлик депортация қилинди
Ўзбекистон фуқаролари махсус чартер рейси орқали Тошкентга олиб келинди.
АҚШ иммиграция қонунларини бузган 18 нафар Ўзбекистон фуқароси махсус чартер рейси орқали Тошкент халқаро аэропортига олиб келинди. Бу ҳақда Дунё ахборот агентлиги хабар берди.
Маълум қилинишича, депортация қилинган фуқароларни олиб келган самолёт 1 август куни Тошкентга қўнган. Уларнинг Ўзбекистонга қайтарилиши Ўзбекистон ва АҚШ ваколатли органлари ўртасидаги мувофиқлаштирилган ҳамкорлик натижасида амалга оширилган.
Икки давлатнинг масъул идоралари фуқароларнинг шахсини аниқлаш, зарур ҳужжатларни расмийлаштириш ҳамда уларни хавфсиз тарзда ватанга қайтариш билан боғлиқ барча ташкилий ва ҳуқуқий жараёнларни ҳамкорликда амалга оширган.
Қайд этилишича, Ўзбекистон миграция соҳасида хорижий ҳамкорлар билан доимий алоқаларни йўлга қўйган бўлиб, ноқонуний миграциянинг олдини олиш, миграция қонунчилиги бузилишларини камайтириш ҳамда хориждаги Ўзбекистон фуқароларининг ҳуқуқ ва манфаатларини ҳимоя қилиш бўйича ҳамкорликни изчил давом эттирмоқда.
