Исроил Трампнинг Ғазо бўйича режасини ўз позициясига мос эмас деб баҳолади

Исроил АҚШга президент Доналд Трамп илгари сурган Ғазо урушини якунлаш режасига оид хавотирларини билдирганини маълум қилди. Шу билан бирга, Исроил армияси Фаластин ҳудудига зарбаларни давом эттирмоқда. Бу ҳақда Al Arabiya хабар берди.

 

Бош вазир Бенямин Нетаняху идораси матбуот котиби Дорон Шпилманнинг AFP агентлигига маълум қилишича, Исроил режа юзасидан ўз изоҳ ва эътирозларини АҚШ томонига етказган. Унинг айтишича, оммага эълон қилинган ҳужжат Исроил позициясини тўлиқ акс эттирмайди.

 

Нетаняху идораси ҲАМАСдан тўлиқ ва текшириладиган қуролсизланишни талаб қилмоқда. Аввалроқ ҲАМАС Трамп режасига мувофиқ қуролларини янги ташкил этилаётган Фаластин бошқарув қўмитасига топширишга рози бўлганини эълон қилганди.

 

Исроил разведкаси маълумотларига кўра, Трамп эълон қилган сулҳ даврида ҲАМАС қайта қуролланиб, янги жангчиларни ёллашни давом эттирган. Нетаняху идораси бундай шароитда ташкилотнинг тўлиқ қуролсизлантирилиши ҳар қандай узоқ муддатли келишувнинг асосий шарти эканини таъкидламоқда.

 

Шу билан бирга, Тинчлик кенгаши томонидан эълон қилинган йўл харитасида Исроил Ғазодаги ҳарбий амалиётларни тўлиқ тўхтатиши ва қўшинларини ҳудуддан босқичма-босқич олиб чиқиши назарда тутилган.

 

Ғазода эса жанговар ҳаракатлар давом этмоқда. Маҳаллий хавфсизлик манбалари якшанба тонгидан бери Исроил зарбалари оқибатида 19 нафар фаластинлик, жумладан аёллар ва болалар ҳалок бўлганини маълум қилди. Фаластин расмийлари, шунингдек, шанба куни уюштирилган зарба оқибатида катта миқдордаги тиббий воситалар йўқ қилинганини билдирди.

 

Айни пайтда Исроил армияси ҲАМАС тинч аҳоли инфратузилмасидан ҳарбий мақсадларда фойдаланаётганини даъво қилиб, Ғазо бўйлаб қурол омборларига зарбалар бераётганини маълум қилмоқда.

 

Кузатувчиларга кўра, вазият Трамп ва Нетаняху ўртасида Ғазо урушини якунлаш масаласида қарашлар тафовути мавжудлигини яна бир бор намоён этмоқда.