Ўзбекистонда автобус йўл ҳақларини ошириш таклиф қилинди

 

Иқтисодиёт ва молия вазирлиги ҳузуридаги Соя иқтисодиётини қисқартириш, солиқ ва божхона маъмуриятчилигини такомиллаштириш ҳамда фискал таҳлил институти жамоат транспортини молиялаштириш тизимини ислоҳ қилиш бўйича қатор таклифларни илгари сурди.

 

Таклифлар 30 июль куни ўтказилган фискал мулоқот давомида тақдим этилди.

 

Институт маълумотларига кўра, бугунги кунда жамоат транспорти бўйича ялпи шартномаларни молиялаштириш учун давлат буджетидан йилига 1,9 триллион сўм ажратилмоқда. Шундан 1,3 триллион сўми Тошкент шаҳридаги жамоат транспорти тизимига тўғри келади. Ҳозирда транспорт тизими харажатларининг 65,1 фоизи субсидия ҳисобидан қопланмоқда.

 

Қайд этилишича, субсидиялар ҳажми 2024 йилдаги 1 триллион сўмдан 2025 йилда 1,2 триллион сўмга, 2026 йилда эса 1,385 триллион сўмга етган. Натижада, икки йил ичида ушбу кўрсаткич 38,5 фоизга ошган.

 

Институт таҳлилларига кўра, Тошкент ва ҳудудлардаги жамоат транспорти имкониятлари ўртасида сезиларли тафовут мавжуд. Шунингдек, субсидиялар ҳажми ортиб бораётганига қарамай, уларнинг самарадорлиги ва натижалари етарли даражада шаффоф ҳамда ўлчаб бўладиган тизимга эга эмас.

 

Шу боис институт қуйидаги таклифларни илгари сурди:

• йўловчилар оқими паст бўлган йўналишларни оптималлаштириш;

• автобус йўл ҳақларини босқичма-босқич иқтисодий жиҳатдан асосланган даражага яқинлаштириш;

• ҳудудларда жамоат транспорти қамровини кенгайтириш;

• ташувчиларга тўланадиган маблағларни хизмат сифати кўрсаткичларига боғлаш;

• имтиёзли тоифадаги фуқаролар учун мақсадли қўллаб-қувватлаш тизимини сақлаб қолиш.

 

Институтнинг таъкидлашича, мақсадли субсидиялар тизимига босқичма-босқич ўтиш орқали Тошкент жамоат транспортига ажратилаётган маблағларнинг бир қисмини ҳудудларда транспорт инфратузилмасини ривожлантиришга йўналтириш мумкин бўлади.